მომღერალი და ჯგუფ Danity Kane-ის ყოფილი წევრი ობრი ო’დეი აცხადებს, რომ შონ კომბსის წინააღმდეგ მიმდინარე სასამართლო პროცესში ჩვენების მიცემას არ აპირებს – ყოველ შემთხვევაში, ამ ეტაპზე.
ეს განცხადება ო’დეიმ 16 მაისს, Amy Robach & T.J. Holmes Present: Aubrey O’Day, Covering the Diddy Trial-ის პოდკასტის პირველ ეპიზოდში გააკეთა. პოდკასტი iHeartRadio-სთვის ნიუ-იორკში ჩაიწერა.
„ამჟამინდელი გარემოებების გათვალისწინებით, არ ვაპირებ ჩვენების მიცემას დიდის საქმეზე,“ – აღნიშნა 41 წლის მომღერალმა. თუმცა დაამატა, რომ მისი მონაწილეობა პროცესში ჯერ კიდევ შესაძლებელია: როგორც აღმოჩნდა, მას უკვე დაეკონტაქტა აშშ-ის შიდა უსაფრთხოების დეპარტამენტი (Homeland Security) და შეხვედრაც შედგა. სწორედ ეს უწყება ხელმძღვანელობდა მარტში კომბსის ლოს-ანჯელესის და მაიამის საცხოვრებელ სახლებში ჩატარებულ რეიდებს.
საჯარო ინტერესი ო’დეიმ მიმდინარე კვირაშიც დაიმსახურა. სოციალურ მედიაში მის მიერ გამოქვეყნებულმა პოსტმა სპეკულაციები გამოიწვია იმის შესახებ, აპირებდა თუ არა ის სასამართლოში გამოცხადებას.
ობრი ო’დეი ერთ-ერთი ყველაზე გახმაურებული მუსიკალური რეალითი შოუს, MTV-ს Making the Band-ის მეშვეობით გახდა ცნობილი. მისი მენტორი სწორედ Diddy იყო. ჯგუფი Danity Kane 2005 წელს სწორედ ამ შოუში ჩამოყალიბდა და მოგვიანებით კომბსის ლეიბლთან, Bad Boy Records-თან გააფორმა კონტრაქტი. 2008 წელს ო’დეიმ ჯგუფი დატოვა. მომღერალმა 2022 წელს, პოდკასტში Call Her Daddy, განაცხადა, რომ ამის მიზეზი მისი მხრიდან კომბსის მოთხოვნებზე უარის თქმა გახდა. მომღერალმა ისიც თქვა, რომ რეპერის მოთხოვნებს მუსიკასთან არავითარი კავშირი არ ჰქონდა.
აღსანიშნავია, რომ ო’დეი ერთ-ერთი პირველი იყო, ვინც საჯაროდ გამოხატა პოზიცია დიდი სკანდალის ფონზე. 2024 წლის სექტემბერში, მას შემდეგ რაც კომბსი დააკავეს, მომღერალმა X-ზე დაწერა: „სამართლიანობის არსი ის არის, რომ წარსულს წერტილი დაუსვას და მოგვცეს სივრცე ახალი თავის დასაწყებად. ქალებს ასეთი შანსი იშვიათად ეძლევათ. ვგრძნობ, რომ ჩემს ამბავს ვიღაც სერიოზულად მოეკიდა. ეს დღე გამარჯვებაა ყველა ქალისთვის, არა მხოლოდ ჩემთვის. რაღაცები მართლა იცვლება.“
