ჯასტინ ბიბერი ჰეილი ბიბერის წარმატებებს აღნიშნავს. მას შემდეგ, რაც 23 მაისს ცნობილი გახდა, რომ ჰეილიმ კომპანია Rhode, რომელიც კანის მოვლის საშუალებებს აწარმოებს, კოსმეტიკურ გიგანტ e.l.f. Beauty-ს 1 მილიარდ დოლარად მიჰყიდა, პოპვარსკვლავი სოციალურ ქსელში ცოლის წარმატებულ ბიზნეს საქმიანობას გამოეხმაურა.
ინსტაგრამზე ჯასტინმა ჰეილის ფოტო გამოაქვეყნა, სადაც ის საქმიანი იმიჯით, თეთრ კოსტიუმშია გადაღებული. ფოტოსთან ერთად მან ჰეილის მიერ დადებული პოსტის ე.წ. სქრინშოტიც გამოაქვეყნა, სადაც ახალ ამბავს თავად ამცნობს გამომწერებს:
„როცა 2022 წელს Rhode დავაარსე, მას დიდ ოცნებებს ვუკავშირებდი. ჩემთვის ყველაზე მნიშვნელოვანი ის იყო, რომ Rhode კიდევ უფრო ბევრ სივრცეში და მეტი ადამიანის სახეზე გამოჩენილიყო მთელ მსოფლიოში,“ – წერს ჰეილი თავის პოსტში. „ამიტომ, დღეს განსაკუთრებულად აღფრთოვანებული და ამაყი ვარ, რომ გიზიარებთ სიახლეს – ვერთიანდებით e.l.f. Beauty-სთან. კომპანიასთან, რომელსაც ჩემსავით სჯერა დიდი იდეების, ინოვაციისა და განსხვავებულად აზროვნების ძალის. ვგრძნობ, რომ სრული მზადყოფნით ვდგამ ნაბიჯს და ახალ ეტაპზე გადავდივარ, როგორც Rhode-ს კრეატიული დირექტორი და ინოვაციების ხელმძღვანელი, ასევე e.l.f. Beauty-ს სტრატეგიული მრჩეველი. დიდ მადლობას ვუხდი Rhode-ს გასაოცარ გუნდს. ამ ყველაფერს თქვენი გარეშე ვერ გავაკეთებდი. და, რა თქმა უნდა, ჩვენს მომხმარებლებს – უღრმესი მადლობა მხარდაჭერისთვის და მეგზურობისათვის. შემდეგ თავში კიდევ უფრო დაუვიწყარი თავგადასავალი გველის – ერთად!”
ჯასტინ ბიბერმა ჰეილის ეს პოსტიც თავისი ინსტაგრამის ე.წ. Story-ზე გააზიარა.
