Apple TV+-ის ახალი ანიმაციური ფილმი Lulu Is a Rhinoceros 30 მაისს გამოვა, პრემიერის წინ Billboard Family ექსკლუზიურად გთავაზობთ ანიმაციის საუნდტრეკს, სახელწოდებით – The Perfect Me.
სიყვარულით სავსე და მხიარულ სიმღერაში აული კრავალიოს პერსონაჟები მოტივაციის ასამაღლებელ ტექსტს მღერიან. „იდეალური მე – მე ვარ, იდეალური შენ – შენ ხარ, როცა ერთმანეთს ვუსმენთ, მთელი სამყარო ჰარმონიაშია!” / The perfect me is me / The perfect you is you / And when we listen to each other / The whole world is more in tune, yeah! )
პრემიერის პარალელურად, აული კრავალიომ და ანიმაციის შემქმნელებმა, ჯეისონ და ალისონ ფლომებმა და მუსიკალურმა პროდიუსერმა LELAND-მა – Billboard-თან ექსკლუზიურად სიმღერის მთავარ გზავნილზე ისაუბრეს, რომელიც როგორც ბავშვებისთვის, ასევე ზრდასრულებისთვისაც აქტუალურია.
„ვგიჟდები პერსონაჟ ლულუს ენთუზიაზმით სავსე სულზე და მის შინაგან სიბრძნეზე, რომელმაც ზუსტად იცის, თუ ვინ არის. The Perfect Me-ს ჩაწერის პროცესი, ძალიან სახალისო იყო, მას მარტივი, თუმცა მნიშვნელოვანი მესიჯი აქვს. შეიძლება, სხვებმა მიგითითონ, თუ როგორ უნდა გამოიყურებოდე, ან როგორ მოიქცე, მაგრამ უნდა იცოდე, რომ შენ უკვე სრულყოფილი ხარ.” – ამბობს აული კრავალიო.
ჯეისონ და ალისონ ფლომებმა, რომლებმაც საბავშვო წიგნის ორიგინალი ვერსია ერთად დაწერეს, ანიმაციური ფილმის აღმასრულებელი პროდიუსერებიც არიან.
„როდესაც სიმღერის ტექსტს ვქმნიდით, პერსონაჟის შინაგან სამყაროს აღვწერდით, სიმღერაში ლულუ, ფლომ-ფლომი და ჰიპ-ჰოპი თითოეული სიტყვით ამტკიცებენ, რომ ისინი საკუთარი არჩევანით არიან ისინი, ვინც არიან. მათ არაფერი აქვთ დასამტკიცებელი, სრულყოფილები არიან.” – ამბობს ალისონ ფლომი Billboard-თან საუბარში.
ჯეისონი კი დასძენს: „ისინი გვახსენებენ, რომ მათში ბევრად მეტი რამ იმალება, ვიდრე სხვებს ჰგონიათ ან წარმოიდგენენ… ვფიქრობთ, სიმღერა The Perfect Me არა მხოლოდ ბავშვების, არამედ ყველა მსმენელის გულამდე მივა. იმედი გვაქვს, რომ ეს სიმღერა მათ თავდაჯერებას შემატებს.”
Lulu Is a Rhinoceros პარასკევს, 30 მაისს, Apple TV+-ზე გამოვა, საუნდტრეკი კი Apple Music-სა და სხვა სტრიმინგ პლატფორმებზე იქნება ხელმისაწვდომი.
ანიმაციის მუსიკალური პროდიუსერია პოპ-მომღერალი და კომპოზიტორი LELAND, რომელიც Billboard-თან საუბარში ამბობს: „ალისონ ფლომის ბრწყინვალე ტექსტებისთვის შესაფერისი მელოდიებისა და აკორდების პოვნა ჩემთვის საინტერესო გამოწვევა იყო. ვცადე, ისეთი მელოდიები შემექმნა, რომლებიც დასრულებული, ემოციით სავსე და მარტივი იქნებოდა, რათა ბავშვებს რამდენიმე მოსმენაში შეეძლოთ მისი წამღერება. გავიხსენე ბავშვობაში ჩემთვის საყვარელი მუსიკალური ფილმებიდან სიმღერები, რომლებიც დღემდე მახსოვს. The Perfect Me-ს გზავნილი მარტივია, მაგრამ ძალიან მნიშვნელოვანი. ყველასთვის, ბავშვებისთვისაც და დიდებისთვისაც, საჭიროა შეხსენება, რომ საკუთარი თავი უნდა მოგვწონდეს და გვიყვარდეს.”
მოისმინეთ სიმღერა The Perfect Me ექსკლუზიური პრემიერა ანიმაციური ფილმიდან Lulu Is a Rhinoceros:
