მაილი საირუსის უახლესი ნამუშევარი Something Beautiful 30 მაისს გამოვიდა.
ალბომი 13 კომპოზიციას მოიცავს და როგორც არტისტი აღწერს, იგი „უნიკალურ პოპ-ოპერას წარმოადგენს, რომელიც ფანტაზიითაა გაჯერებული“. მასში შესულია სინგლები: Prelude, Something Beautiful, End of the World და More to Lose.
სიმღერაზე Walk of Fame მაილიმ Alabama Shakes-ის გიტარისტ ბრიტანი ჰოვარდთან ერთად იმუშავა, ხოლო სიმღერა Every Girl You’ve Ever Loved-ში სუპერმოდელი ნაომი კემბელი მონაწილეობს.
ალბომს თან ახლავს ფილმიც, რომლის პრემიერაც აშშ-სა და კანადაში, კინოთეატრებში მხოლოდ ერთი ღამით – 12 ივნისს გაიმართება, ხოლო საერთაშორისო ერთდღიანი ჩვენება 27 ივნისს იგეგმება.
მაილი საირუსი ახალი ალბომის გამოსვლას დიდი ხნის განმავლობაში აანონსებდა, ნოემბერში მან გაამხილა, რომ ის Pink Floyd-ის The Wall-ის ინსპირაციითაა შექმნილი, თუმცა მისი თქმით, ეს ალბომი უფრო გლამურული და პოპ-კულტურით გაჯერებული იქნებოდა.
Something Beautiful მაილი საირუსის 2023 წლის ალბომ Endless Summer Vacation-ის შემდეგ პირველი ალბომია. ამ უკანასკნელმა კი Billboard 200-ის რეიტინგში მე-3 ადგილი დაიკავა.
28 მაისს, ლოს-ანჯელესში, Chateau Marmont-ში გამართულ შოუზე მომღერალმა განაცხადა, რომ უკვე ფიქრობს მომდევნო პროექტზე:
„ჩემი შემდეგი ალბომი ძალიან ექსპერიმენტული იქნება. Something Beautiful მხოლოდ დასაწყისია.” – განუცხადა მაილი საირუსმა მსმენელს.
მოისმინეთ მაილი საირუსის ახალი ალბომი – Something Beautiful:
