17-28 ივნისს თბილისი უკვე ტრადიციად ქცეულ საფორტეპიანო ფესტივალს უმასპინძლებს. თბილისი პიანო ფესტი 2025 წლის სეზონით ბრუნდება და წლევანდელ საკონცერტო პროგრამას აქვეყნებს. ფესტივალის ფარგლებში თბილისს მსოფლიოში აღიარებული პიანისტები ეწვევიან. 17 ივნისს პიანო ფესტს მარკ-ანდრე ჰამელინი გახსნის.
დუდანა მაზმანიშვილი – პიანისტი, თბილისი პიანო ფესტის დამფუძნებელი:
„წლევანდელ ფესტივალზე მოწვეული გვყავს რამდენიმე ის მუსიკოსი, რომელიც გამორჩეულად დაამახსოვრდა ქართველ მსმენელს. მათ შორის არის ლეგენდარული კანადელი პიანისტი მარკ-ანდრეა ჰამელინი, რომელიც 11-ჯერ არის ნომინირებული გრემიზე და ყველაზე ღრმა და მრავალფეროვანი რეპერტუარით გამოირჩევა. ფესტივალს უბრუნდება ასევე ალექსეი ვოლოდინი, რომელიც უკვე ორჯერ იყო თბილისში. ასევე გვიბრუნდება ფრანჩესკო ლიბეტა, რომელმაც ორი წლის წინ ეროვნულ ბიბლიოთეკაში დაუვიწყარი კონცერტი გამართა. იგი ცნობილია, როგორც, შეიძლება ითქვას, დაუკვრელი, ვირტუოზული ნაწარმოებების შემსრულებელი და წარმოუდგენელი ტექნიკის პიანისტი. გარდა ამისა, თბილისს ეწვევა კონსტანტინ ლიფშიცი და ასევე ანდრიუს ჟლაბისი, რომელიც ცნობილია იმით, რომ ასრულებს გია ყანჩელის მუსიკას, რასაც იუთუბზე ორ მილიონზე მეტი ნახვა აქვს.
ახალგაზრდა პიანისტებიდან მინდა გამოვყო უკიდეგანოდ ნიჭიერი, ემოციური და ინტელექტუალი მარტინ გარსია გარსია, რომელმაც შოპენის კონკურსიდან დაგვამახსოვრა თავი. მინდა აღვნიშნო, რომ ყველა ეს პიანისტი 2-3-დღიან შუალედში ახერხებს თბილისში ჩამოსვლას და ეს ძალიან დასაფასებელია, რადგან ქართველ მსმენელს ეძლევა საშუალება, ცოცხლად მოუსმინონ იმ პიანისტებს, რომლებიც უკრავენ ბერლინის ფილარმონიაში, კონცერტჰაუსში, როიალ ალბერტ ჰოლში და ა.შ.
ფესტივალს ყოველ წელს თავად ვხურავ ხოლმე ორკესტრთან ერთად ღია ცის ქვეშ, თუმცა წელს გადავწყვიტე, რომ მსმენელის წინაშე სოლო კონცერტით წარვდგე 27 ივნისს, ხოლო ფესტივალი 28 ივნისს დასრულდება ღია ცის ქვეშ, სადაც გაიმართება კონცერტი ოჯახებისთვის, ბავშვებისთვის და ყველა მსურველისთვის. შარშან დავიწყეთ და დავამკვიდრეთ ეს ფორმატი და იმდენად პოპულარული გახდა, ხშირად გვეკითხებოდნენ, გავიმეორებდით თუ არა.
აუცილებლად უნდა აღვნიშნოთ ისიც, რომ გრძელდება საგანმანათლებლო კომპონენტიც და წელსაც გაიმართება მასტერკლასები, სადაც როგორც ქართველი, ისევე უცხოელი ახალგაზრდა მუსიკოსები მიიღებენ მონაწილეობას.”
ბილეთები შეიძინეთ ბმულზე.
