კენდრიკ ლამარმა 2025 წლის BET-ის დაჯილდოებაზე დიდი გამარჯვება მოიპოვა. არტისტმა ჯილდო მიიღო წლის ალბომის კატეგორიაში 2024 წლის ალბომისთვის – GNX.
დაჯილდოება ლოს-ანჯელესის Peacock Theater-ში გაიმართა. ცერემონიისას ლამარმა სცენიდან ახსნა, რატომ იყო მისთვის BET-ისგან მიღებული აღიარება განსაკუთრებული. დაჯილდოებაზე სტუმრებს შორის იყო კენდრიკ ლამარის კოლაბორატორი და ტურნეს პარტნიორი SZA, რომელიც რეპერს სიტყვით გამოსვლისას ამხნევებდა.
„დიდი ხანია, აქ არ ვყოფილვარ, მაგრამ ამ ადგილს ყოველთვის გულით ვატარებდი. BET ყოველთვის ზუსტად ასახავს ჩვენს კულტურას,” – ახსნა ლამარმა.
რეპერმა მადლობა პირველ რიგში ღმერთს გადაუხადა, შემდეგ კი საკუთარ გუნდს – PGLang-ის წევრებს. ბოლოს კიდევ ერთხელ მიუთითა დარბაზში მყოფ SZA-ზე და დაამატა: „SZA დარბაზშია, ერთად ვართ ტურნეში. აუცილებლად მოდით კონცერტზე.“
ლამარი სცენიდან ჩასვლას აპირებდა, როცა საღამოს წამყვანმა კევინ ჰარტმა შეაჩერა და კიდევ რამდენიმე ჯილდო გადასცა. BET-ის წლევანდელი შოუს მთავარი გმირი სწორედ კენდრიკი იყო – მან ჯამში 10 ნომინაცია მიიღო.
GNX, რომელიც ნოემბერში გამოვიდა, ლამარისთვის წარმატებული პროექტი აღმოჩნდა. ალბომი სამი კვირის განმავლობაში ბილბორდის ტოპ 200-ის სათავეში იყო და მასში შესული არაერთი სინგლი ჰიტად იქცა. მათ შორის არის Luther, რომელიც რეპერმა SZA-სთან ერთად ჩაწერა და რომელიც 13 კვირის განმავლობაში Billboard-ის Hot 100-ის ჩარტის ლიდერ პოზიციებს იკავებდა.
კენდრიკ ლამარი ამჟამად სწორედ ამ ალბომის მხარდასაჭერად მართავს ტურნეს – Grand National Tour, რომელსაც SZA-სთან ერთად ატარებს. ტურნე აპრილში მინეაპოლისში დაიწყო.
აღსანიშნავია, რომ BET-ის დაჯილდოებაზე წლის ალბომის ნომინაციაში კენდრიკ ლამარისთვის ეს პირველი გამარჯვება არ არის – ბოლოს ეს ჯილდო არტისტს 2018 წელს გადაეცა ალბომისთვის Damn. ამ ნამუშევარმა კენდრიკ ლამარს პულიცერის პრემიაც მოუტანა.
