მაილი საირუსმა ღიად ისაუბრა, თუ როგორ გაგრძელდა მისი მუსიკალური კარიერა „ჰანა მონტანას” დასრულების შემდეგ. 32 წლის პოპვარსკვლავმა და მსახიობმა The Ringer-ის პოდკასტში სტუმრობისას გაამხილა, რომ დისნეის პოპულარული სერიალის დასრულების შემდეგ, 2011 წელს, მას შოუსთან დაკავშირებული სიმღერების შესრულება აუკრძალეს.
„როცა დისნეი დავტოვე, აღარ მქონდა უფლება, ჰანა მონტანას სიმღერები მემღერა. არ ვამბობ, თითქოს ეს ძალიან მინდოდა. The Best Of Both Worlds რომ მემღერა We Can’t Stop-სა და Wrecking Ball-ს შორის, უბრალოდ უაზრობა იქნებოდა,” – თქვა საირუსმა.
მუსიკოსის თქმით, მიუხედავად ყველაფრისა, იმ მუსიკისგან მოწყვეტა, რომელიც მის ადრეულ იდენტობას ასე მჭიდროდ უკავშირდებოდა, რთული აღმოჩნდა. „მაინც მწყინდა – იმ სიმღერებში ჩემი ხმაა, მათ მე ვმღეროდი და მეკრძალებოდა მათი შესრულება,“ – იხსენებს ის.
ცვლილებები 2024 წლის აგვისტოდან დაიწყო, როცა საირუსს დისნეის ლეგენდის სტატუსი ოფიციალურად მიანიჭეს ცერემონიაზე, რომელიც ანაჰაიმში, Honda Center-ში გაიმართა.
„მას შემდეგ, რაც დისნეის ლეგენდა გავხდი, ამ სიმღერების შესრულების ნებაც დამრთეს – რაც, ჩემი აზრით, ძალიან მაგარია,“ – თქვა მომღერალმა The Ringer-თან საუბრისას.
„ჰანა მონტანა” პირველად 2006 წლის მარტში გავიდა ეთერში და მალევე კულტურულ ფენომენად იქცა – მისი ეპიზოდების პრემიერებმა რეკორდულ მაჩვენებლებს მიაღწია: სერიალი 5.4 მილიონმა მაყურებელმა ნახა, რაც მაშინდელი დისნეი არხის ისტორიაში ყველაზე მაღალი მაჩვენებელი იყო. 13 წლის საირუსი მაილი სტიუარტის როლს ასრულებდა – თინეიჯერის, რომელიც მალიბუში ცხოვრობდა, დღისით ჩვეულებრივი მოსწავლე იყო, ღამით კი – ანონიმური პოპვარსკვლავი.
ჰანა მონტანას სახელით საირუსი Billboard Hot 100-ში 20 სიმღერით მოხვდა. მათ შორის ყველაზე წარმატებული იყო He Could Be the One, რომელიც 2009 წელს ტოპ ათეულში შევიდა. შოუს თემატური სიმღერა – The Best of Both Worlds 2006 წელს ჩარტებში 92-ე ადგილზე მოხვდა.
ჰანა მონტანას სახელით მაილიმ სამჯერ დაიკავა Billboard 200-ის პირველი ადგილი ალბომებით: Hannah Montana, Hannah Montana 2 / Meet Miley Cyrus და Hannah Montana: The Movie Soundtracks.
