ჯასტინ ბიბერმა 11 ივლისს R&B ჟანრის ალბომი SWAG გამოსცა. 21-ტრეკიანი ჩანაწერის მოსმენისას მსმენელებმა მოულოდნელად აღმოაჩინეს, რომ Yukon-ზე კომპოზიტორად და ტექსტის ავტორად ემინემი არის მითითებული.
თუმცა, საქმე არც კლასიკურ ავტორობას ეხება და არც მოწვეული არტისტის სტატუსით მონაწილეობას. ტრეკში ბიბერი მაღალი ტონალობით მღერის: I can help you get a move on, like U-Haul, and I know – რაც, რეალურად, ემინემის სიმღერის, Untitled-ის ერთ-ერთი ხაზის ინტერპრეტაციაა.
ბიბერი დიდი ხანია, ემინემის გულშემატკივარია – 2022 წლის ოქტომბერში ის მეუღლესთან, ჰეილი ბიბერთან ერთად სეირნობისას ემინემის გამოსახულებიანი მაისურით გამოჩნდა. ჯასტინ ბიბერის ახალი ჩანაწერის რეპ-გავლენა მხოლოდ ემინემი არ არის. კარტერ ლენგის პროდიუსერობით შექმნილ ამავე ტრეკში პერიოდულად 2 Chainz-ის ძველი ხმოვანი ჩანართებიც ჩნდება და რეპერი ბექ-ვოკალშიც არის მითითებული.
აღსანიშნავია, რომ ალბომი ბიბერმა განსაკუთრებული ხმაურის გარეშე გამოუშვა – ფანებმა 10 ივლისს ნიუ-იორკში, ლოს-ანჯელესში, ატლანტასა და რეიკიავიკში (ისლანდია) გამოკრულ ბილბორდებზე შეამჩნიეს მინიშნებები. თუმცა, Billboard-ის წყაროების თქმით, ეს მხოლოდ პირველი ნაბიჯია ბიბერის მუსიკალურ კარიერაში და ის ახალი შემოქმედებითი ეპოქის დაწყებას გეგმავს.
მოუსმინეთ ბიბერის Yukon-ს და ემინემის Untitled-ს:
