ახალგაზრდა თაობის მომღერალი Aflou 1992 წელს ჩინეთში, ტუჯიას ეთნიკურ ჯგუფში, ჰუბეის პროვინციის პრეფექტურაში დაიბადა. მრავალმხრივი ნიჭით გამორჩეული არტისტი მუსიკისა და ტექსტების გარდა, პროდიუსინგის მიმართულებითაც მუშაობს.
Aflou-ს ხშირად ურბანული ინდი მუსიკის პოეტად მოიხსენიებენ, რომელიც ქალაქის განწყობებს მელოდიად გარდაქმნის.
Aflou-ს ნაზი და მშვიდი ხმის ჟღერადობა მის მუსიკას სიღრმესა და ემოციურ ელფერს სძენს. ურბანული ცხოვრებისეული დაკვირვების უნარით იგი თანამედროვე ახალგაზრდებისთვის ახლოს მდგომ მუსიკალურ ლანდშაფტს ქმნის.
Aflou-მ მუსიკის შექმნა სტუდენტობის პერიოდში, 2019 წელს, ლონდონში სწავლისას დაიწყო, სადაც ალტერნატიული პოპ-დუეტი სახელწოდებით YUN SEN ჩამოაყალიბა, დუეტის სიმღერა All I Have ინდიპრემიით დაჯილდოვდა.
ჩინეთში დაბრუნების შემდეგ, Aflou-მ სოლო სიმღერების შექმნა დაიწყო, რომელიც პლატფორმა Weibo-ზე ატვირთა და პოპულარობა მოიპოვა.
Aflou-მ 2022 წელს ლიუ ჰუანის ორიგინალური მუსიკის გრანტი მიიღო და სადებიუტო ალბომი Three Seconds to the Galaxy გამოსცა, რომელმაც კრიტიკოსების მაღალი შეფასება დაიმსახურა. ალბომი სხვადასხვა პლატფორმის ჩარტებში 51-ჯერ მოხვდა და 2023 წლის Tencent Waves-ის მუსიკის დაჯილდოებაზე საუკეთესო ვიზუალური დიზაინის ჯილდო მიიღო. ამავე ღონისძიებაზე Aflou საუკეთესო ახალ არტისტადაც იყო ნომინირებული.
მომღერალი თავისი გამორჩეული ენერგიული შესრულებით ათზე მეტ წამყვან მუსიკალურ ფესტივალზე წარდგა, მათ შორის არის: Strawberry Music Festival, Midu Music Festival და Corona SunSets Festival.
2024 წელს Aflou-მ ჩინეთის ერთ-ერთ უმაღლესი დონის მუსიკალურ შოუში – Sing! China მიიღო მონაწილეობა, რასაც ცხრა ქალაქში გამართული ტურნე მოჰყვა.
2025 წელს Aflou-მ მეორე ალბომი The Shouldn’t-Be Should გამოსცა, რომელიც მისი შემოქმედების ახალი ეტაპის დასაწყისი გახდა.
