20 ივლისს ქართულმა ინდი ბენდმა „კოლექტივმა“ ახალი სიმღერა, სახელწოდებით „აღმართები“ გამოუშვა. კომპოზიციას თან ერთვის ილუსტრირებული ანიმაციური ვიდეო, რომლის ავტორიც მარიამ საკნელაშვილია.
სიმღერა „აღმართები“ ბენდისთვის დამახასიათებელი სტილის ერთგვარი გაგრძელებაა – მელანქოლიისა და ნოსტალგიის ნაზავი, რომელიც წარსულის განცდებსა და ემოციებს გადმოსცემს. სიმღერის ტექსტი პირად განცდებზე გვიყვება, რაც, შესაძლოა, მსმენელისთვისაც მარტივად აღქმადი და ნაცნობი იყოს.
“აღმართების მელოდია ორი წლის წინ დაიწერა და ამ დროის განმავლობაში თაროზე იყო შემოდებული. ცოტა ხნის წინ გადავწყვიტეთ, გადმოგვეღო თაროდან, დაგვემუშავებინა და ხალხისთვის გაგვეზიარებინა. რადგან ცოტათი ძველი სიმღერაა, რთულია იმის გახსენება, თუ რა იყო შთაგონება, თუმცა ხშირ შემთხვევაში ინსპირაციას კონკრეტულად ერთი წყარო ალბათ არ აქვს და არის ბევრი გარეგანი და შინაგანი პროცესის ანარეკლი.
მართალია, მუსიკა ორი წლის წინანდელია, მაგრამ ტექსტი ზედ ახლახანს დავამღერეთ. აღმართების ამბავი გაუცხოებაზეა, ალბათ მოკლედ ასე შეიძლება ითქვას.” – კოლექტივი.
„კოლექტივი“ 2019 წელს ჩამოყალიბდა და ქართულ ენაზე ნამღერი ტექსტებით, მელოდიური, ნატიფი მუსიკით და გულწრფელი ემოციებით მალევე დაიმკვიდრა ადგილი ქართულ მუსიკალურ სივრცეში. ბენდის შემადგენლობაში არიან: მარიამ სამუშია, მიხო კალანდარიშვილი, დიმა დიასამიძე, გიკო კვანტრიშვილი და ანუკა ყიფშიძე.
მოისმინეთ კოლექტივის სიმღერა „აღმართები“
