12 ივლისს სან მარკოს მოედანზე ქართველი ტენორი მიხეილ შეშაბერიძე წარდგა. ვენეციის მთავარ მოედანზე პიეტრო მასკანის ოპერა Cavalleria Rusticana შესრულდა. წარმოდგენა უკვე ტრადიციად ქცეული კონცერტების სერიის ნაწილია, რომელსაც სან მარკოს მოედანზე Teatro La Fenice მართავს. ტრადიციას საფუძველი 1928 წელს სწორედ Cavalleria Rusticana-ს ოპერით ჩაეყარა.
ოპერა კონცერტის ფორმით იყო წარმოდგენილი, რომელსაც რიკო საკანი დირიჟორობდა. იტალიაში მოღვაწე ქართველმა ტენორმა მასში ტურიდუს პარტია შეასრულა. წარმოდგენა 16 ივლისს Rai3-ზე გადაიცა, ხოლო 23 ივლისს Rai5-ის ეთერით გადაიცემა. საკუთარი ემოციები მიხეილ შეშაბერიძემ Billboard საქართველოს გაუზიარა:
მიხეილ შეშაბერიძე:
„ჩემთვის ეს იყო ალბათ ერთ-ერთი ყველაზე გამორჩეული გამოსვლა. იტალიის თითქმის ყველა თეატრში მაქვს ნამღერი, მაგრამ რაც აქ ხდებოდა, ასეთი რამ მე არსად მინახავს. სან მარკო ალბათ მსოფლიოში ყველაზე ლამაზი მოედანია და, აი, ზღაპრული წარმოდგენა თუ შეიძლება რამეს ეწოდოს, ნამდვილად ეს იყო. სრულიად განსხვავებული ემოციები მქონდა. საოპერო თეატრში, იქნება ეს დახურული თუ ღია, სხვანაირი გარემო, სხვანაირი ემოციებია, აქ კი – აბსოლუტურად სხვანაირი, ნამდვილად ვერაფერს შევადარებ. თანაც, არ ველოდი, რომ მსახიობთა შორის მოვხვდებოდი და ორმაგად გაოცებული და ემოციებით სავსე ვარ.”
ნახეთ ვიდეო.
