Cowboy Carter Tour-ის ფარგლებში ბიონსე ქართველი დიზაინერის, ირაკლი რუსაძის კოსტიუმით წარდგა

ბიონსეს Cowboy Carter Tour ერთ-ერთი ყველაზე ხმაურიანი მოვლენაა მუსიკალურ სამყაროში. ტურნე უკავშირდება მის რიგით მეშვიდე სტუდიურ ალბომს – Cowboy Carter, რომელიც 2024 წლის მარტში გამოვიდა და გრემიც მოიპოვა. 

Cowboy Carter Tour 2025 წლის 28 აპრილს დაიწყო და 26 ივლისს დასრულდა. ტურნე მუსიკალურთან ერთად ვიზუალური ელემენტებითაც გამოირჩეოდა. განსაკუთრებით აღსანიშნავია კოსტიუმები, რომლებითაც ბიონსე და მისი თანმხლები მოცეკვავეები შოუს დროს სცენაზე ჩნდებოდნენ. სწორედ მათ შორის არის ქართული ბრენდის – SITUATIONIST-ის მიერ შექმნილი კოსტიუმებიც.

თანამშრომლობის შესახებ SITUATIONIST-ის დამფუძნებელს და შემოქმედებით ხელმძღვანელს, დიზაინერ ირაკლი რუსაძეს ვესაუბრეთ:

„ჩვენი მხრიდან ეს ბიონსესთან რიგით მეორე თანამშრომლობაა. პარიზის კვირეულზე ახალი კოლექციის წარდგენის შემდეგ დაგვიკავშირდა მისი სტილისტი და თანამშრომლობა შემოგვთავაზა. SITUATIONIST-ის შექმნილი კოსტიუმები ბიონსეს და მოცეკვავეებს მუსიკალური ნომრების შესრულებისას ეცვათ. სამუშაო პროცესი ორი თვის განმავლობაში გრძელდებოდა, ჯამში დაახლოებით 100-მდე კოსტიუმი შევკერეთ. სთაილინგსა და კოსტიუმების გადანაწილებას ბოონსეს სტილისტი ხელმძღვანელობდა. კოსტიუმების შექმნის გაიდლაინები Cowboy Carter-ის ტურის თემატიკას ეყრდნობოდა, შესაბამისად, ჩვენი ნამუშევრები წინასწარ განსაზღვრული პალიტრისა და ე.წ. მუდბორდის მიხედვით შეიქმნა.“

როგორც ირაკლი რუსაძე Billboard Georgia-სთან საუბრისას აღნიშნავს, სამუშაო პროცესი საკმაოდ შრომატევადი იყო. ამ დროის განმავლობაში კი SITUATIONIST-ის შემოქმედებით გუნდს თითქმის ყოველდღიური კომუნიკაცია ჰქონდა Beyoncé-ს წარმომადგენლებთან.

როგორც ირაკლი რუსაძე გვიყვება, თანამშრომლობა წარმატებული აღმოჩნდა. „პროექტი ძალიან პოზიტიურად შეფასდა და მომავალშიც დიდი სიამოვნებით ვიმუშავებდით ბიონსეს გუნდთან,” – ამბობს SITUATIONIST-ის შემოქმედებითი ხელმძღვანელი.

აღსანიშნავია, რომ SITUATIONIST ერთადერთი ქართული ბრენდია, რომელიც პარიზის მოდის კვირეულის ოფიციალურ განრიგშია. კვირეულის ფარგლებში ბრენდის მუდმივი მხარდამჭერია SOLO. ეს თანამშრომლობა Cowboy Carter-ის ტურის კოსტიუმებზე მუშაობის დროსაც გაგრძელდა.

ლიზა ქისტაური, SOLO-სა და Wealth Management-ის ბრენდ მენეჯერი:

„SOLO განაგრძობს ქართველი არტისტების მხარდაჭერას, რათა მათ შეძლონ საკუთარი პოტენციალის სრულად გამოვლენა და როგორც ლოკალურ, ასევე საერთაშორისო ასპარეზზე მიაღწიონ წარმატებას. სწორედ ამიტომ, როდესაც ირაკლი დაგვიკავშირდა და გვესაუბრა ამ პროექტის შესახებ, დიდი სიხარულით დავთანხმდით.  გვიხარია, რომ მოგვეცა შესაძლებლობა, SITUATIONIST-ის მხარდამჭერი ვყოფილიყავით ამ საინტერესო გზაზე, რომელიც ირაკლი რუსაძის ნამუშევრების გლობალურ ასპარეზზე წარდგენას ემსახურებოდა. გამომდინარე იქიდან, რომ ირაკლის საკმაოდ ცოტა დრო ჰქონდა კოსტიუმების შესაქმნელად, ჩვენ ყოველ ნაბიჯზე მის გვერდით ვიდექით და სრულ მზაობას ვუცხადებდით ნებისმიერ საკითხში მხარდაჭერისთვის.“

ბიონსემ ირაკლი რუსაძესთან 2023 წელსაც ითანამშრომლა. Renaissance-ის მსოფლიო ტურნეს დროს მომღერალმა ერთ-ერთი შოუ სწორედ ქართველი დიზაინერის კოსტიუმით გახსნა.

SITUATIONIST-ის დებიუტი 2015 წელს, “თბილისის მერსედეს-ბენც მოდის კვირეულის” პირველ სეზონზე შედგა. ბრენდი აერთიანებს როგორც ქალის, ისე მამაკაცის ხაზს. SITUATIONIST-ის ამ დროისთვის ბოლო, 2025 წლის შემოდგომა/ზამთრის კოლექცია 10 მარტს, პარიზის მოდის კვირეულზე იყო წარდგენილი.