ავსტრალიელ მუსიკოს ნიკ კეივს საფრანგეთის ქალაქ არლში ორი პრესტიჟული ჯილდო გადაეცა.
კეივი, რომელიც ამჟამად ევროპის სოლო ტურნეში იმყოფება, არლში კონცერტისთვის შაბათს, 26 ივლისს ჩავიდა. კონცერტის დილას კი 67 წლის მუსიკოსი Hôtel de Ville-ში გამოჩნდა, სადაც მას ორი საპატიო ჯილდო გადასცეს.
ცერემონიაზე კეივს მიენიჭა ხელოვნებისა და სიტყვის რაინდის წოდება. პრესტიჟული ჯილდო გადაეცემა მათ, ვისაც „მნიშვნელოვანი წვლილი აქვს შეტანილი ფრანგული კულტურული მემკვიდრეობის გამდიდრებაში.”
გარდა ამისა, ქალაქის მერმა პატრიკ დე კაროლიმ კეივი არლის მედლით დააჯილდოვა მისი არტისტული წვლილისა და „განსაკუთრებული კავშირებისთვის” ქალაქთან.
„თქვენ ხართ მსოფლიოს მოქალაქე და ხართ არლის მოქალაქე,” – მიმართა მერმა მუსიკოსს სიტყვით გამოსვლისას.
კეივმა მერს იუმორით უპასუხა და აღნიშნა, რომ მისი ფრანგული საუბრიდან ვერც ერთი სიტყვა ვერ გაიგო. თავად მუსიკოსის მადლობის სიტყვა კი მოიცავდა ისეთი ფრანგი პოეტების აღიარებას, როგორებიც არიან რემბო და ბოდლერი და ასევე ფრანგული კულტურის როლს მის შემოქმედებაში.
კეივი არ არის პირველი ავსტრალიელი მუსიკოსი, რომელმაც ამ მასშტაბის ფრანგული ჯილდო დაიმსახურა. 2009 წელს ტინა არენა გახდა ავსტრალიის პირველი მოქალაქე, რომელმაც საფრანგეთის ეროვნული ღირსების ორდენი მიიღო. ჯილდო მას ფრანგულ კულტურაში შეტანილი წვლილისთვის პრეზიდენტმა ნიკოლა სარკოზიმ გადასცა.
