პოლ მარიო დეი, ინგლისელი ვოკალისტი, რომელიც ცნობილია, როგორც საკულტო მეტალჯგუფის, Iron Maiden-ის სოლისტი, 69 წლის ასაკში გარდაიცვალა.
დეი ჯგუფს 1975 წელს ბასისტ სტივ ჰარისის მიწვევით შეუერთდა. თუმცა ბენდის იმდროინდელმა შემადგენლობამ მხოლოდ 10 თვე გაძლო. დეიმ ჯგუფი დატოვა იმ მოარული ხმების გამო, რომ მას აკლდა ორივე – ენერგია და ქარიზმა.
„როცა Iron Maiden-ში ვმღეროდი, ეს იყო მორიგი პაბის ბენდი, რომლის მოსმენაც არავის სურდა,” – იხსენებდა დეი. „ჩვენ არაფერს წარმოვადგენდით და ვცდილობდით, საუკეთესო მუსიკა შეგვექმნა და აუდიტორიისთვის გვებრძოლა.”
დეი, რომელსაც ჯგუფის არც ერთ ჩანაწერში არ მიუღია მონაწილეობა, დენის უილკოკმა შეცვალა, რომელიც ბენდში ასევე მცირე ხნით, 1978 წლამდე დარჩა. უილკოკის ნაცვლად პოლ დი’ანო მოვიდა, რომელმაც ბენდის პირველ ორ ალბომში იმღერა. შემდეგ კი ისიც ბრიუს დიკინსონმა ჩაანაცვლა.
Iron Maiden-ის 1980 წლის სადებიუტო ალბომში შევიდა სიმღერა Strange World, რომელიც, დეის მტკიცებით, მისი თანაავტორობით იყო შექმნილი, რაც არსად ყოფილა ნახსენები. „მაშინ ჩვენ ყველანი ერთ მხარეს ვიყავით. ახლა კი ძალიან მტკივნეულია იმის გააზრება, რომ სულ პირველი სიმღერა, რომელიც დავწერე, ბენდის ყველაზე გაყიდვად ალბომში შევიდა და არავინ იცის, რომ ის მე შევქმენი,” – ამბობდა დეი.
2019 წელს კი მუსიკოსმა განაცხადა, რომ თანაავტორობის საკითხი დასრულებული იყო. „ყველაფერი კარგადაა,” – თქვა მან.
Iron Maiden-ში ხანმოკლე გამოჩენის შემდეგ დეი იყო სოლისტი ჯგუფებში More და Wildfire. შემდეგ კი ინგლისელი როკერების განახლებულ ბენდს, Sweet-ს შეუერთდა.
„პოლი ბრიტანული მძიმე მეტალის ახალი ტალღის უზარმაზარი ნაწილი იყო ჯერ კიდევ Iron Maiden-ის პერიოდიდან დაწყებული და, რა თქმა უნდა, მისი ფანტასტიკური შესრულებით ალბომში Warhead,” – წერს More სოციალურ მედიაში გავრცელებულ განცხადებაში.
80-იან წლებში დეი საცხოვრებლად ავსტრალიაში გადავიდა, სადაც გარდაცვალებამდე აქტიურ მუსიკალურ საქმიანობას ეწეოდა.
„ჩემი დიდი მწუხარება მის მეუღლე სესილის, მის ოჯახსა და მეგობრებს,” – წერს Sweet-ის გიტარისტი ენდი სკოტი. „სევდიანი დღეა Sweet-ის ფანებისთვის.”
