ოზი ოსბორნის მიმართ ჩაფიქრებულმა პატივისცემამ როდ სტიუარტი საბოლოოდ კრიტიკის ქარცეცხლში გაახვია. 80 წლის მომღერალმა კონცერტის დროს ეკრანზე ხელოვნური ინტელექტის მიერ შექმნილი უცნაური ვიდეო გაუშვა, რომელშიც ოსბორნი ზეცაში სელფებს იღებს სხვადასხვა გარდაცვლილ მუსიკოსთან, მათ შორის არიან „პრინცი”, ტინა ტერნერი, ბობ მარლი, კურტ კობეინი, თუფაქი, მაიკლ ჯექსონი, ფრედი მერკური და სხვები.
ფანის მიერ გადაღებულ ვიდეოს სოციალურ ქსელში კომენტარების ზღვა მოჰყვა. „ეს ნარკოტიკით გამოწვეულ ფსიქოზს ჰგავს, რომელმაც ოზი სარეაბილიტაციო ცენტრამდე მიიყვანა. 7/10. 10/10-იც შეიძლებოდა ყოფილიყო, თუ პრინცესა დაიანასაც დაამატებდნენ და კიდევ ვინმეს, ვინც ჯერ არ მომკვდარა,” – წერს ერთ-ერთი მომხმარებელი. კომენტარებში ასევე ვკითხულობთ: „Weekend at Bernie’s… პრინცს ისიც კი არ უნდოდა, რომ თავისი მუსიკა „სპოტიფაიზე” ყოფილიყო, ამიტომ სახელი შეიცვალა, რომ ინტელექტუალური საკუთრება დაეცვა. 100%-ით დარწმუნებული ვარ, არასდროს მოაწერდა ხელს როდ სტიუარტის მიერ მისი სახის გამარიონეტებაზე.” „ხელოვნური ინტელექტის მიერ შექმნილი ბევრი ცუდი ვიზუალი მინახავს კონცერტებზე, მაგრამ ეს ახალი ფსკერია.”
Charlotte Observer-ის თქმით, აღნიშნული გამოსვლა სტიუარტმა დაასრულა სიტყვებით: „ძალიან საწყენია. ამ ადამიანებიდან ბევრი ნარკოტიკის გამო დაიღუპა… მე კი აქ ვარ!”
ოზი ოსბორნის გარდაცვალების შემდეგ უამრავი არტისტი ცდილობს, მუსიკოსს პატივი მიაგოს. მათ შორისაა სტიუარტიც, რომელიც Forever Young-ს, უფრო ტრადიციული გზებით, მუდმივად ოსბორნს უძღვნის. 22 ივლისს მან ინსტაგრამზე დაწერა: „ნახვამდის, ოზი. მშვიდად იძინე, მეგობარო. მანდ შევხვდებით ადრე თუ გვიან.”
წინა კონცერტზე კი Forever Young-ის შესრულებისას სტიუარტმა თქვა: „ამ კვირაში ოზის სახით ნამდვილი ლეგენდა დავკარგეთ… მე მის ოჯახს ძალიან კარგად ვიცნობ. მალე შენთან ვიქნები… მაგრამ ძალიან მალე არა.”
ოსბორნის და სტიუარტის წარმომადგენლებს მომხდარზე კომენტარი არ გაუკეთებიათ.
