Jessie J მკერდის სიმსივნის ოპერაციის შემდეგ ჰოსპიტალიზაციის შესახებ განახლებულ ინფორმაციას აქვეყნებს

მომღერალი Jessie J ძუძუს კიბოს ოპერაციის შემდეგ მოულოდნელად ისევ კლინიკაში აღმოჩნდა.

გამოცემა E! News-ის ინფორმაციით, 37 წლის მომღერალმა ჯესი ელენ კორნიშმა 2 აგვისტოს ინსტაგრამ Story-ში დაწერა, რომ ოპერაციიდან ექვსი კვირის შემდეგ ჯანმრთელობის გაურკვეველი პრობლემებით ისევ კლინიკაში დაბრუნდა.

„ნახეთ, როგორ გავატარე ბოლო 24 საათი. ისევ იმ პალატაში დავბრუნდი, სადაც ოპერაციის შემდეგ ვიყავი. ეს არც მოსალოდნელი იყო და არც დაგეგმილი. ისევ მქონდა სიმპტომები, რომლებიც ფილტვში სისხლის შედედებაზე მიუთითებდა, თუმცა, საბედნიეროდ, ეს არ არის სისხლის შედედება.“ – დაწერა Jessie J-მ და საავადმყოფოდან ფოტო გააზიარა. 

მოგვიანებით მომღერალმა ინსტაგრამ Story განაახლა და დაწერა: „გავეწერე კლინიკიდან და რეაბილიტაციის პროცესს სახლში გავაგრძელებ.“

Jessie J-ს თქმით, მას ინფექცია აღმოაჩნდა:  „ბევრი ტესტი ჩავიტარე. საბოლოოდ ინფექცია აღმომაჩნდა. ჯერ კიდევ ცდილობენ დადგენას, თუ რა სახისაა ეს ინფექცია, ფილტვებში ცოტაოდენი სითხე მაქვს, სუნთქვა მიჭირს, მაგრამ გუშინ ღამით კლინიკიდან გავეწერე და რეაბილიტაციას სახლში გავაგრძელებ.” – წერს მომღერალი.  

3 აგვისტოს  ინსტაგრამ Sory-ში გამოქვეყნებულ პოსტში Jessie J-მ დაამატა: „მივიღე საბოლოო დიაგნოზი. ბევრი მეკითხება, როგორც ჩანს, ამას დრამატიზირება ჰქვია. სიმპტომები იგივეა, ისევ არ ვიცით, რა არის ზუსტად, მაგრამ შემიძლია ვთქვა, რომ ჩემი სარკაზმი და იუმორის გრძნობა ისევ ძლიერია.” 

Jessie J-მ სელფ-ვიდეოც გამოაქვეყნა და თქვა, რომ ეს მისი ოპერაციის შემდეგ პირველი „რეალურ დროში გადაღებული“ პოსტია. მომღერალმა აღნიშნა, რომ კონტენტის შექმნას არც ფიქრობდა და უბრალოდ დასვენება სჭირდებოდა. 

მომღერლის თქმით, რამდენიმე დღის წინ მას სუნთქვაც უჭირდა და მკერდში ტკივილის შეგრძნება ჰქონდა, თუმცა ახლა თავს უკეთ გრძნობს. „ახლა მხოლოდ რამდენიმე სიმპტომი მაქვს და იმედია, რომ ეს უბრალოდ ვირუსი იყო.”  – აღნიშნა მან. Jessie J-მ მხარდაჭერისთვის მადლობა გადაუხადა დედას, მეგობრებს და ახლობლებს, რომლებიც ეხმარებიან და მის ორი წლის შვილთან, სკაისთან დროს ატარებენ.

ივლისში Jessie J-მ თქვა, რომ ანალიზებმა კიბოს გავრცელება არ აჩვენა. მომღერალს სიმსივნური ქსოვილების ამოკვეთის ოპერაცია 23 ივნისს ჩაუტარდა და მოგვიანებით კიდევ ერთ ქირურგიულ მკურნალობას საჭიროებს.