NPR-ის პოპულარული კონცერტების სერიის, Tiny Desk-ის პროდიუსერმა ინსტაგრამზე განცხადება გაავრცელა და შოუს ფანებს აუწყა, რომ, CPB-ის დახურვის მიუხედავად, პოპულარული შოუ გაგრძელდება.
პოსტში Tiny Desk-ის წამყვანი და პროდიუსერი ბობი კარტერი გამოეხმაურა გავრცელებულ ჭორებს, თითქოს შოუ დახურვის პირასაა მას შემდეგ, რაც ტრამპის ადმინისტრაციამ განაცხადა, რომ CPB-ს ხურავდა, რის შედეგადაც NPR-სა (საზოგადოებრივი რადიო) და PBS-ს (საზოგადოებრივი მაუწყებელი) დაფინანსება უწყდებოდა.
„ბევრი ადამიანისგან გავიგე, რომ NPR/Tiny Desk იხურება,” – წერს კარტერი. „ეს ასე არ არის. სამწუხაროდ, იხურება CPB. მოვუწოდებ ყველას, მხარი დაუჭირონ საზოგადოებრივ მედიას და გააკეთონ შემოწირულობები. ვაფასებ ყველა ზარსა და მესიჯს. ეს ყველაფერი ძალიან სასიამოვნოა.”
— DJ Cuzzin B (@DJCuzzinB) August 3, 2025
მაშინ, როცა ფანები არხის მომავალზე ღელავენ, Tiny Desk რეალურად ფართოვდება. ცოტა ხნის წინ ჩაეშვა Tiny Desk Radio – ახალი ყოველკვირეული შოუ, რომლის წამყვანებიც ბობი კარტერი და ანამარი სეირი არიან. თუმცა იმავეს ვერ ვიტყვით CPB-ზე, კერძო არასამთავრობო ორგანიზაციაზე, რომელიც კონგრესმა 1967 წელს შექმნა ფედერალური მთავრობის მიერ მაუწყებლის დასაფინანსებლად და რომელიც საზოგადოებრივი რადიოს, ტელევიზიისა და ონლაინ პლატფორმის დაფინანსების ერთადერთი მსხვილი წყაროა. CPB-ის ფინანსების 70%-ზე მეტი ადგილობრივ საზოგადოებრივ რადიოებსა და სატეველიზიო არხებს ხმარდებოდა, რომელთა ნახევარიც რეგიონების მცხოვრებთათვის ინფორმაციის ერთადერთ წყაროს წარმოადგენს.
CPB-ის სრულად დახურვა სექტემბერში იგეგმება. NPR-მა სარჩელი შეიტანა დაფინანსების შეწყვეტაზე ტრამპის ბრძანებისა და კონგრესის გადაწყვეტილების წინააღმდეგ, რომლის გამოც, შესაძლოა, არაერთი ადგილობრივი საზოგადოებრივი მედია სერიოზული ფინანსური პრობლემების წინაშე დადგეს ან მთლიანად დაიხუროს.
Tiny Desk 2008 წელს დაიწყო. დღემდე შოუმ 1200 ზე მეტ აქტს უმასპინძლა, მათ შორის ისეთი ვარსკვლავების გამოსვლებს, როგორებიც არიან დუა ლიპა. სტინგი, ადელი და სხვები.
