Col Joye, როკ-ენ-როლის პიონერი და ავსტრალიის ხმის ჩამწერი ასოციაციის (ARIA) დიდების დარბაზის წევრი, 89 წლის ასაკში გარდაიცვალა. მუსიკოსი ცნობილია იმით, რომ ის იყო პირველი, ვინც როკ-ენ-როლი ადგილობრივი ჩარტების ლიდერ პოზიციაზე გაიყვანა.
კოლინ ჯეიკობსენი 1936 წელს სიდნეიში დაიბადა. მუსიკაში პირველი ნაბიჯები 1957 წელს გადადგა, როგორც მისი ძმის, კევინ ჯეიკობსენის ჯგუფის, KJ Quintet წევრი. სიდნეის Jazzorama-ში მიწვევის შემდეგ ჯგუფის გეგმები, სახელად Col Jay and the Playboys დაერქვათ, შეიცვალა და მალე ისინი ცნობილი გახდნენ სახელწოდებით Col Joye and the Joy Boys.
მიუხედავად იმისა, რომ მოგვიანებით სახელის შეცვლა ინანეს, ბენდმა წარმატებისკენ სვლა განაგრძო და 1959 წელს სიდნეის ჩარტის პირველ ადგილზე მოხვდა სიმღერით Bye Bye Baby. იმავე წელს ისინი გახდნენ პირველი ავსტრალიელი არტისტები, რომლებიც ეროვნული ჩარტის პირველ ადგილზე გავიდნენ სიმღერით Oh Yeah Uh Huh, რომელიც ჩარტში ოთხი კვირის განმავლობაში ლიდერობდა. ამას კი შემდეგი ათი ლიდერი ჰიტიც მოჰყვა.
საშემსრულებლო კარიერის გარდა, ჯოიმ და კევინმა დააარსეს საკუთარი კომპანიები, ხმის ჩამწერი ლეიბლი და სააგენტო. ამ მიმართულებით ერთ-ერთი ყველაზე დიდი წარმატება Bee Gees-თან კონტრაქტის გაფორმება იყო, რომელიც 1961 წელს დიდი ყურადღების ქვეშ მოექცა.
1971 წელს სწორედ Bee Gees გახდა პირველი ავსტრალიური მუსიკალური აქტი, რომელმაც Hot 100-ის პირველი ადგილის დაკავება შეძლო სიმღერით How Can You Mend a Broken Heart. მომდევნო წლებში ამ შედეგს ჯგუფმა კიდევ რვაჯერ მიაღწია.
1988 წელს ჯოი გახდა ავსტრალიის ხმის ჩამწერი ასოციაციის დიდების დარბაზის პირველი ნაკადის წევრი AC/DC-სთან, ჯოან საზერლენდსა და სხვა არტისტებთან ერთად.
„მუსიკიდან დაწყებული, ტელევიზიით დასრულებული, კონცერტები, არტისტების მენეჯმენტი, ლაივ შესრულებები – ექვს ათწლეულზე მეტია, Col Joye-ს განუზომელი წვლილი აქვს ავსტრალიის მუსიკაში,” – აღნიშნავს ARIA-ს დირექტორი ანაბელ ჰერდი გავრცელებულ განცხადებაში.
„იმ დროს, როცა ადგილობრივ ინდუსტრიაშიც აშშ-სა და დიდი ბრიტანეთის არტისტები დომინირებდნენ, მან დაამტკიცა, რომ ავსტრალიელი ხალხი თავის არტისტებსა და მუსიკას შეიყვარებდა. ჩვენი ღრმა მწუხარება ჯოის ოჯახს. ძალიან მოგვენატრება.”
