მადონა ღაზაში არსებულ ჰუმანიტარულ კრიზისზე მწვავე მესიჯს ავრცელებს და ადამიანების ტანჯვის დასრულებას ითხოვს, რაც მიმდინარე ომითაა გამოწვეული. ინსტაგრამზე გავრცელებულ წერილში პოპვარსკვლავი, პირველ რიგში, ღმერთს მიმართავს.
„გთხოვ, მიდი ღაზაში და მიუტანე შენი სინათლე ბავშვებს, სანამ ძალიან გვიანი არ არის. როგორც დედა, ვერ ვუძლებ მათი ტანჯვის ყურებას. მსოფლიოს ბავშვები ყველას ეკუთვნის. შენ ერთადერთი ხარ ჩვენ შორის, რომელსაც იქ მისვლას ვერ დაუშლიან,” – წერს მომღერალი. „ჩვენ გვჭირდება ჰუმანიტარული კორიდორების სრულად გახსნა, რათა უდანაშაულო ბავშვები დავიცვათ. დრო აღარ ითმენს.”
„დღეს ჩემი ვაჟი როკოს დაბადების დღეა. ვფიქრობ, საუკეთესო საჩუქარი, რისი მიცემაც მისთვის, როგორც დედას, შემიძლია, ეს არის, რომ ვთხოვო ყველას, გააკეთონ ყველაფერი, რაც კი შეუძლიათ, რათა დაიცვან უდანაშაულო ბავშვები, რომლებიც ორმხრივი ცეცხლის ზონაში არიან ჩარჩენილი. თითს არ ვიშვერ, არც არავის ვადანაშაულებ და არც ერთის მხარეს არ ვიჭერ. ეს ყველას აზიანებს. მე უბრალოდ ვცდილობ, გავაკეთო ის, რისი გაკეთებაც შემიძლია, რათა ეს ბავშვები შიმშილით სიკვდილისგან ვიხსნა.”
ომი თითქმის ორი წელია, მიმდინარეობს. ამ პერიოდის განმავლობაში კი ვრცელდება არაერთი ცნობა, რომ ისრაელის სამხედრო ძალა რეგიონში ჰუმანიტარული დახმარების შესვლას ბლოკავს. საომარი მოქმედებები 2023 წლის 7 ოქტომბერს დაიწყო, როცა ჰამასმა 1200-ზე მეტი ისრაელელი მოკლა და 250-ზე მეტი ტყვე აიყვანა. მას შემდეგ, PBS-ის თანახმად, 61 000-ზე მეტი პალესტინელი დაიღუპა ისრაელის საპასუხო მოქმედებების შედეგად, უამრავი ადამიანი კი რეგიონში გავრცელებული შიმშილითა და უსახლკარობით იტანჯება.
მადონა არ არის ერთადერთი მუსიკოსი, რომელმაც პალესტინელი ხალხის მხარდამჭერი მესიჯი გაავრცელა. ცოტა ხნის წინ ოლივია როდრიგომ დაგმო ის „საზარელი” პირობები, რომელშიც ბავშვებს უწევთ ყოფნა. U2-მ კი დაწერა: „დიდი ხანია, ყველა შეძრწუნებული ვართ იმით, რაც ღაზაში ხდება, მაგრამ ჰუმანიტარული დახმარების დაბლოკვასა და ახლა კიდევ ღაზას სამხედრო აღების გეგმებს ეს კონფლიქტი სრულიად გაუკვალავ ტერიტორიაზე გადაჰყავს.”
ნახეთ მადონას პოსტი:
