სნუპ დოგი ავსტრალიაში მასშტაბური აუდიტორიის წინაშე წარდგება – რეპერი AFL-ის (ავსტრალიის საფეხბურთო ლიგის) საფინალო პერფორმანსის მთავარი შემსრულებელი იქნება.
ჰიპ-ჰოპის კალიფორნიელი ლეგენდა 2025 წლის სექტემბერში მელბურნის სტადიონზე (MCG) გამართავს მუსიკალურ შოუს. MCG არის სტადიონი, რომელიც ავსტრალიური ფეხბურთის მთავარი მოვლენის ჩატარების ადგილია.
„AFL-ის ფინალი ავსტრალიური სპორტული კალენდრის ყველაზე დიდი მოვლენაა და წელს ის კიდევ უფრო გრანდიოზული იქნება,“ – აღნიშნა AFL-ის აღმასრულებელმა დირექტორმა, ენდრიუ დილონმა განცხადებაში, რომელიც 12 აგვისტოს გავრცელდა. „სნუპ დოგი პიონერი და ნამდვილი შოუმენია. ის არაერთხელ გამოსულა სავსე სტადიონებზე მთელი მსოფლიოს მასშტაბით, მაგრამ ვფიქრობთ, რომ MCG-ზე 100 000-მაყურებლიანი აუდიტორია მისთვის ყველაზე სიმბოლური შოუ იქნება.“
NFL-ის Super Bowl-ის მსგავსად, AFL-ის დიდი ფინალი ავსტრალიური საფეხბურთო სეზონის დასასრულს აღნიშნავს. ეს ღონისძიება ქვეყანაში ერთ-ერთი ყველაზე რეიტინგული სატელევიზიო მოვლენაა, რომელსაც ყოველწლიურად მილიონობით მაყურებელი ადევნებს თვალს.
1977 წლიდან მოყოლებული, ფინალური თამაშის დაწყებამდე აუდიტორიის წინაშე არტისტების მუსიკალური პერფორმანსები იმართება. მასშტაბები ბოლო ორ ათწლეულში განსაკუთრებით გაიზარდა, რადგანაც საერთაშორისო შემსრულებლები ამ შოუს მნიშვნელოვან ნაწილად იქცნენ. ბოლო წლების განმავლობაში სცენაზე გამოვიდნენ ედ შირანი, The Killers, KISS და ქეითი პერი.
„გვინდა, რომ ფინალის დღე დაუვიწყარი დღესასწაული იყოს არა მხოლოდ ფეხბურთისთვის, არამედ კულტურისა და გართობის სფეროსთვისაც. სნუპი ამ კონცეფციას იდეალურად ერგება,” – ნათქვამია დილონის განცხადებაში.
სნუპ დოგი შოუს 27 სექტემბერს გამართავს. სხვა შემსრულებელთა ვინაობა ამ ეტაპზე ცნობილი არ არის.
„დიდი პატივია, რომ AFL-ის ფინალისას გამოვალ სცენაზე – ეს ავსტრალიური კალენდრის ერთ-ერთი ყველაზე მასშტაბური ღონისძიებაა. მინდა, ეს დღესასწაული მაყურებელთან ერთად აღვნიშნო. მოდით, ეს დღე დაუვიწყარი გავხადოთ!” – თქვა სნუპ დოგმა.
