როგორც ჩანს, ალტერნატიული პოპის მომღერლებს შორის დაპირისპირებაა – ლანა დელ რეიმ გამოაქვეყნა სიმღერის ფრაგმენტი, რომლის სავარაუდო ადრესატია Ethel Cain.
14 აგვისტოს ლანა დელ რეიმ ინსტაგრამზე ატვირთა ვიდეო, რომელშიც სიმღერის ფრაგმენტი ჟღერდება. ტექსტში ის პირდაპირ ახსენებს Ethel Cain-ს და ამბობს, რომ არტისტს მისი პოსტი არ მოეწონა. ტექსტის ბოლოს ლანა დელ რეი ასევე ახსენებს „ყველაზე ცნობილ გოგონას Waffle House-ში“.
ფანებმა სწრაფად დაიწყეს ტექსტის გაშიფვრა – ბევრმა ლანას „ყველაზე ცნობილი გოგონა Waffle House-ში“ 2022 წელს New York Times-ში გამოქვეყნებული სტატიის სათაურს დაუკავშირა, რომელიც Ethel Cain-ის შესახებ იყო. სხვებმა კი გაიხსენეს Cain-ის უკვე წაშლილი ფოტო, რომელიც ძალიან ჰგავდა Del Rey-ს 2022 წლის ფოტოს.
ლანა დელ რეიმ ინსტაგრამის კომენტარში თავადაც განმარტა Cain-თან დაპირისპირების ისტორია: „რამდენიმე წლის წინ არც ვიცოდი, ვინ იყო Ethel, სანამ ერთმა ადამიანმა არ მაჩვენა პოსტები, სადაც ჩემს ფოტოებს რაღაც არსებებსა და მულტფილმის პერსონაჟებს ადარებდა. ის მუდმივად აკეთებდა კომენტარებს ჩემს წონაზე. ვერ ვხვდებოდი, ამით რისი მიღწევა სურდა. შემდეგ საერთო მეგობრებისგან გავიგე, როგორ საუბრობდა და ერეოდა ჩემს პირად ცხოვრებაში. ეს ნამდვილად შემაშფოთებელი იყო“. აღსანიშნავია, რომ ეს კომენტარი მალევე წაიშალა.
Cain-მა კი, თავის მხრივ, ინსტაგრამის ე.წ. ისტორიაში დაწერა, რომ ლანა დელ რეიმ სოციალურ ქსელში დაბლოკა.
Billboard-მა კომენტარისთვის ორივე არტისტს მიმართა. Cain-მა ცოტა ხნის წინ თავისი მეორე ალბომი – Willoughby Tucker, I’ll Always Love You გაავრცელა და ამჟამად ჩრდილოეთ ამერიკაში ტურნეს მართავს.
რაც შეეხება ლანა დელ რეის, მომღერალმა 2025 წელს უკვე გამოუშვა სინგლები Bluebird და Henry, Come On, თუმცა თავისი მე-10 სტუდიური ალბომის შესახებ დეტალები ჯერ არ გაუმხელია.
ნახეთ ლანა დელ რეის ინსტაგრამის პოსტი, სადაც მის სიმღერაში Ethel Cain-ის სახელი ჟღერდება.
