გერმანიაში მოღვაწე ქართველი არტისტი ლიზი გოზალიშვილი 26 სექტემბერს სადებიუტო EP-ის, სახელწოდებით Pretty Scars, გამოსცემს. ამის შესახებ არტისტმა სოციალურ მედიაში დაწერა. EP ოთხი სიმღერისგან შედგება, რომელთაგანაც სინგლი CHAOS წლის დასაწყისში გამოვიდა.
ლიზი გოზალიშვილი, მუსიკოსი:
„Pretty Scars ჩემი სადებიუტო EP და ამავდროულად ჩემი ყველაზე ნამდვილი სიმღერების კრებულია. EP ოთხი სიმღერისგან შედგება. მათგან ერთ-ერთს საზოგადოება უკვე იცნობს. დანარჩენი სამიდან თითოეული სამ სხვადასხვა მდგომარეობაში მყოფ ლიზის წარმოგვიდგენს.”
არტისტის თქმით, ამ პროექტში განსაკუთრებული ყურადღება მის შინაგან განცდებსა და ემოციებს ეთმობა, რომლებიც ყოველდღიურ ცხოვრებაში სხვადასხვა გამოწვევას უკავშირდება.
„ამ სიმღერებში იმ პრობლემებსა და არასასიამოვნო სიტუაციებზე ვსაუბრობ, რომლებსაც საკუთარ თავს თავად ვუქმნით და რისი აღიარებაც ხშირად არ გვინდა, დაწყებული უსაფუძვლო ეჭვებით, დამთავრებული საკუთარ თავთან გამუდმებული კონფლიქტით. ამ გზას შეიძლება ყოველდღიურადაც გავდიოდეთ. სინამდვილეში კი აუცილებელია, მივხვდეთ, რომ მთელი ეს აღმართ-დაღმართები ჩვენი ნაწილია, რომლებიც ჩვენს წარსულ ცხოვრებას მშვენიერი ნაიარევებივით გასდევს თან.”
ლიზი გოზალიშვილმა ახალ პროექტზე გერმანიაში პროდიუსერ ტიმ კარტჰაუსთან ერთად იმუშავა. მუსიკოსის თქმით, ბენდის როლი უმნიშვნელოვანესი იყო:
,,EP-ზე გერმანიაში ჩემს პროდიუსერ ტიმ კარტჰაუსთან ერთად ვიმუშავე. მიქსინგი კლაუს შულტეს ეკუთვნის. გარდა ამისა, კრეატიულ პროცესში უდიდესი წვლილი შეიტანა ჩემმა ბენდმა. მათი დახმარებით საკუთარ სიმღერებში ყოველ ჯერზე რაღაც ახალს აღმოვაჩენ ხოლმე, პროფესიონალი მუსიკოსები არიან და EP-ზე მათთან ერთად მუშაობა ძალიან ბევრის მომტანი იყო ჩემთვის. თითოეული მათგანის მადლობელი ვარ და მიხარია, რომ შევძელი იმ ადამიანების პოვნა, რომელთაც საკუთარ სიმღერებს თვალდახუჭული (ალბათ უფრო ყურებდახშული) ვანდობ. საბოლოო ჯამში, სიმღერებს, ისევე როგორც ჩვენს ლაივ გამოსვლებს, ემჩნევა, რომ ბევრი ადამიანის თავისუფალი შემოქმედების ნაყოფია და ვფიქრობ, ეს მსმენელისთვის საინტერესო უნდა იყოს.”
EP-ის პრემიერა 26 სექტემბერს ბონში, კლუბ N8Lounge-ში იგეგმება, სადაც ლიზი გოზალიშვილი კონცერტს გამართავს.
„Pretty Scars 26 სექტემბერს გამოვა. ამავე დღეს გავმართავთ კონცერტს გერმანიაში, ქალაქ ბონში, კლუბ N8Lounge-ში. ეს კონცერტიც გულწრფელი და ახლო შეხვედრა იქნება ყველა იმ ადამიანთან, ვისაც Pretty Scars-ის მუხტის გაზიარება სურს.
ეს სიმღერები განსაკუთრებით პერსონალურია. მათი გამოშვება ერთგვარ გულის გადაშლას ჰგავს. ცხადია, იმედს ვიტოვებ, რომ ჩემს ამბებში ბევრი საკუთარ თავს ამოიცნობს და მიხვდება, რომ მსგავსი რამ მხოლოდ მას არ განუცდია. საკუთარ თავთან ყველა ჩვენებურად ვიბრძვით.”
დაელოდეთ ლიზი გოზალიშვილის ახალ EP-ის – Pretty Scars, რომელიც არტისტის შინაგან განცდებს, შემოქმედებით ხედვასა და მუსიკალურ ძიებებს აერთიანებს.
