YE (ყოფილი კანიე უესტი) ამტკიცებს, რომ მისი ინსტაგრამი YZY Money-ს სახელით შექმნილი ე.წ. meme coin-ის გაშვების შემდეგ გატეხეს. უესტის მტკიცებით, ჰაკერებმა მის ინსტაგრამზე შეღწევით შექმნეს კრიპტოვალუტის ყალბი ანგარიში, რომელსაც არაფერი აქვს საერთო რეპერის მიერ შექმნილ YZY Money-ს პროექტთან.
„ჩემი ინსტაგრამი გატეხეს და მას ყალბი კრიპტომონეტა აქვს გამოწერილი. ოფიციალური პროექტია @YZY_MNY,” – დაწერა უესტმა 26 აგვისტოს.
My Instagram has been hacked and it’s following a fake coin
— ye (@kanyewest) August 26, 2025
The official project is @YZY_MNY
DrZ26cKJDksVRWib3DWsjo9 eeXccc7hKhDJviiYEEZY
მართლაც, გარკვეული დროის განმავლობაში YE-ს ინსტაგრამზე მხოლოდ ორი ანგარიში ჰქონდა გამოწერილი – ერთი მის მეუღლეს, ბიანკა სენსორის ეკუთვნის, მეორე ანგარიში კი Yeezy Token-ის (yzytkn) სახელით იყო წარმოდგენილი. უესტის თქმით, სწორედ ეს უკანასკნელი არის ინტერნეტ თაღლითების შექმნილი.
Yeezy Token-ის ანგარიშს ამ დროისთვის 1 000-ზე ნაკლები გამომწერი ჰყავს და მხოლოდ ერთი პოსტი აქვს გამოქვეყნებული. კომენტარებში ინტერნეტმომხმარებლებიც აქტიურად აფრთხილებენ სხვებს, რომ აღნიშნული ანგარიში YE-სთან კავშირში არ არის.
20 აგვისტოს კანიე უესტმა Solana-ს ბლოკჩეინზე ე.წ. მიმკოინი გამოუშვა. „Yeezy Money აქ არის. ახალი ეკონომიკა, შექმნილი ბლოკჩეინზე,”– დაწერა Ye-მ სოციალურ ქსელ X-ზე, სადაც მას 33 მილიონზე მეტი გამომწერი ჰყავს.
შემდეგ პოსტში კანიემ ვიდეოც გააზიარა, რომელშიც ამბობს, რომ Yeezy Token ოფიციალურად გამოვიდა.
როგორც CoinGecko-ს მონაცემებზე დაყრდნობით Forbes იუწყებოდა, YZY Money-ს ღირებულებამ გაშვების შემდეგ სწრაფად მოიმატა და 3 მილიარდ დოლარს მიაღწია, შემდეგ კი 1.5 მილიარდ დოლარამდე დაეცა.
Yeezy Money-ს ვებგვერდი ფუნქციონირებს, როგორც ონლაინ გაყიდვების სივრცე, სადაც მომხმარებლებს შეუძლიათ YZY Money-ს ყიდვა-გაყიდვა. საიტზე განთავსებულ განცხადებაში წერია: „YZY MONEY არის კონცეფცია, რომელიც გაძლევს კონტროლს ცენტრალიზებული ხელისუფლებისგან დამოუკიდებლად. YZY არის ვალუტა, რომელიც ახორციელებს ყველა ტრანზაქციას YZY Money-ში.“
YE დიდი ხანია, ინტერესს იჩენს კრიპტოვალუტისა და ბიტკოინის მიმართ. 2020 წელს ჯო როგანთან ინტერვიუში მან ისაუბრა იმ ადამიანებზე, ვინც კრიპტოსფეროში ნოვატორები იყვნენ.
ამ ხალხს მართლაც აქვს ხედვა იმისა, თუ როგორი იქნება ამერიკისა და კაცობრიობის ნამდვილი გათავისუფლება,“ – თქვა მაშინ YE-მ. „ტექნოლოგიური სფეროს ბევრმა წარმომადგენელმა, განსაკუთრებით კი ბიტკოინის მიმდევრებმა, შეძლეს ახალი გზების, ახალი ინფორმაციული არხების გამოყენება და ჩვენი არსებობის შემდეგი საფეხურის შექმნა მაშინ, როცა პოლიტიკური სისტემის ძალაუფლება ჯერ კიდევ მიბმულია საარჩევნო კოლეგიაზე, რომელიც მონობაზე იყო დაფუძნებული.“
