ალექს უორენის სიმღერა Ordinary 2025 წლის Billboard-ის ზაფხულის სიმღერების (Billboard Songs of the Summer) ჩარტის ლიდერია. სიმღერამ ეს ტიტული მას შემდეგ მოიპოვა, რაც ზედიზედ 14 კვირის განმავლობაში ჩარტის სათავეში იმყოფებოდა.
ჩარტი 20 ადგილისგან შედგება და აჯამებს ყველაზე პოპულარულ ტრეკებს. რეიტინგი გამოითვლება Billboard Hot 100-ის სტრიმინგის, რადიო ეთერისა და გაყიდვების მაჩვენებლებზე დაყრდნობით. წელს მონაცემები 7 ივნისიდან 6 სექტემბრამდე გამოქვეყნებული ჩარტების მიხედვით დათვალეს. Billboard Songs of the Summer-ის ჩარტში მონაწილეობა ვერ მიიღეს სიმღერებმა, რომლებიც წლის Songs of the Summer ჩარტში მოხვდნენ ან 2024 წლის ზაფხულამდე Hot 100-ის ჩარტში ლიდერ პოზიციებს იკავებდნენ.
Ordinary-ს წარმატებას კიდევ ის გამოკვეთს, რომ სიმღერა Hot 100-ში 10 კვირის განმავლობაში პირველ ადგილზე იყო. ეს ალექს უორენის კარიერაში პირველი №1 ჰიტია.
ეს უკვე ზედიზედ მეხუთე ზაფხულია, როცა მთელი სეზონის განმავლობაში მხოლოდ ერთმა სიმღერამ დაიკავა ლიდერი პოზიცია Songs of the Summer-ის ჩარტში. მანამდე ამ ტიტულის მფლობელები იყვნენ: Post Malone-ის I Had Some Help (2024), მორგან უოლენის Last Night (2023), ჰარი სტაილსის As It Was (2022) და BTS-ის Butter (2021).
მიუხედავად იმისა, რომ 2023 და 2024 წლებში ზაფხულის ჩარტს მორგან უოლენი ლიდერობდა, 2025 წელს ის მეორე, მესამე და მეოთხე ადგილებზე აღმოჩნდა სიმღერებით: What I Want, Just in Case და I’m the Problem. ის პირველი არტისტია, რომლის სამი ტრეკი ზაფხულის სეზონის ფინალური ჩარტის ტოპ-5-ში ერთდროულად მოხვდა. სამივე სიმღერა არის არტისტის ალბომიდან – I’m the Problem.
გამორჩეულია ისიც, რომ სიმღერამ What I Want ზაფხულის პერიოდში აშშ-ში ყველაზე მეტი – 298 მილიონი ოფიციალური სტრიმი დააგროვა. Ordinary კი ლიდერობდა, როგორც რადიო-ეთერში (930 მილიონი მსმენელი), ასევე გაყიდვების მონაცემებით (92,000 ჩამოტვირთვა).
Songs of the Summer 2025-ის ტოპ ხუთეულში ბოლო ადგილზეა კენდრიკ ლამარისა და SZA-ს კოლაბორაცია – Luther.
ტოპ ათეულის სრული სია ასე გამოიყურება:
6. ლედი გაგასა და ბრუნო მარსის Die With a Smile
7. Golden – HUNTR/X: EJAE, Audrey Nuna და REI AMI
8. ჩაპელ როუნის Pink Pony Club
9. საბრინა კარპენტერის Manchild
10. რეივინ ლენეის Love Me Not.
