ტორონტოელი რეპერი ჟურნალისტ ბობი ალტჰოფს ახალ პოდკასტში – Not This Again ესტუმრა, სადაც ისეთ საკითხებზე ისაუბრა, როგორიცაა მათი პირველი ინტერვიუს შემდეგ ურთიერთობის დაძაბვა, ყალბი ბრალდებები, დაპირისპირება რიკ როსთან და არტისტის ე.წ. „კულტურის მტაცებლად“ მოხსენიება.
როცა დრეიკისა და ბობი ალტჰოფის წინა ინტერვიუს შემდეგ მათი ურთიერთობა დაიძაბა, დრეიკმა სცადა, აეხსნა, თუ რატომ გადაწყვიტა ალტჰოფთან ყოველგვარი კავშირის გაწყვეტა. დრეიკის თქმით, ისეთი შეგრძნება ჰქონდა, თითქოს ეს ინტერვიუ მისთვის ცხოვრებაში არსებული ყველა პრობლემის წყარო იყო. „სინამდვილეში, რისი თქმაც მსურს, არის ის, რომ არ მიმაჩნია ჩემი თავი პრობლემის ნაწილად“, – უთხრა დრეიკმა ბობის, როდესაც ცდილობდა, აეხსნა, თუ რატომ დაბლოკა იგი ყველაგან და მოითხოვა სოციალური ქსელებიდან ვიდეოს წაშლა. „ცხოვრებაში ხშირად ვაწყდები იმ ფაქტს, რომ ადამიანები ისეთ რამეს მაბრალებენ, რაც, რეალურად, ჩემი ბრალი არ არის. მაშინ, როცა არსებითად, ჩემი განზრახვა სუფთაა.“ – უთხრა დრეიკმა ალტჰოფს.
შემდეგ კი დაამატა: „იგივე ხდება მუსიკაშიც. ხალხი ამბობს, რომ მე „კულტურის მტაცებელი“ ვარ, ჩემს კოლაბორაციებს ისე წარმოაჩენენ, თითქოს ამით სარგებელს ვიღებ. საუბარია იმ არტისტებზე, რომელთაც გვერდში დავუდექი და ხელი შევუწყვე. ზოგი ისე აღწერს ამ ყველაფერს, თითქოს მათ რაიმე გამოვტაცე, ამას ნეგატიურ კონტექსტს აძლევენ და ცდილობენ, დააჯერონ სხვები, თითქოს ამას ჩემს სასარგებლოდ ვაკეთებ. როცა მსგავს ფაქტებს ვაწყდები, ძალიან სენსიტიური ვხდები.”
დრეიკის კოლაბორაციები ახალბედა ამომავალ არტისტებთან წლის განმავლობაში ჰიპ-ჰოპის სივრცეში განხილვის საგნად იქცა. ამ საკითხს არაერთხელ შეხო მათი ხმაურიანი დაპირისპირების დროს კენდრიკ ლამარიც, როცა გასული ზაფხულის სიმღერებში euphoria და Not Like Us დრეიკი გააკრიტიკა. კენდრიკ ლამარი არ ყოფილა ერთადერთი, ვინც კოლაბორაციების თემა წამოჭრა. 2019 წელს, დრეიკმა საჯაროდ უპასუხა გრაიმის რეპერ ვაილის კრიტიკას, როცა ტიფანი კალვერთან ერთად თანაწამყვანად წარსდგა 1Xtra Rap Show-ში.
„მძულს, როცა ხალხი ფიქრობს, რომ მე იმ ახალგაზრდების მუსიკა მაინტერესებს, რომლებიც წარმატების მიღწევას და საკუთარი სახელის დამკვიდრებას ცდილობენ, – თითქოს ეს კულტურის მტაცებლად მაქცევს, საერთოდ, რას ნიშნავს ეს? ჯობია, საერთოდ არავინ ვაღიარო? არავის დავუჭირო მხარი? ვფიქრობ, ეს დაბნეული „ჰეითერების” საკითხია, თუმცა ვერასდროს გავიგებ, როგორ შეიძლება სხვისი სიმღერის მხარდაჭერა ან კოლაბორაცია დადებითად არ აღიქმებოდეს, თუმცა, ალბათ ზოგს საკუთარი შეხედულება აქვს ამ საკითხზე.” – აღნიშნა დრეიკმა
ნახეთ დრეიკისა და ბობი ალტჰოფის სრული ინტერვიუ:
