მსოფლიოში ნომერ პირველ აკორდეონისტად აღიარებული ფრანგი მუსიკოსი და კომპოზიტორი ახალ ალბომს New Viaggio (ნიუ ვიაჯო) პარიზში გამოცემამდე თბილისში 9 სექტემბერს ფრანგ ვირტუოზ მუსიკოსებთან ერთად წარუდგენს დამსწრე საზოგადოებას. რიშარ გალიანო კონცერტს გიტარისტ ადრიან მოინიართან (Adrian Moignard) და კონტრაბასისტ ფილიპ არტსთან (Philippe Aerts) ერთად მარჯანიშვილის თეატრის სცენაზე გამართავს.
რიშარ გალიანოს პოეზიითა და ემოციებით სავსე, დროის მიღმა მუსიკალური მოგზაურობა რამდენიმე დღეში თბილისში გადმოინაცვლებს.
ამ ღონისძიებით სოსო ლაღიძის სახელობის ხელოვნების საერთაშორისო ფესტივალი „თბილისი რიტმი” 2025 წლის სეზონს დახურავს.
გალიანოს ალბომი New Viaggio (ნიუ ვიაჯო) ერთდროულად წარსულისთვის მიგებული პატივი და მომავლის ხიდია — განახლებული შემადგენლობით, რომელიც ახალ სიცოცხლეს სძენს მის უკვდავ კომპოზიციებს. აღსანიშნავია, რომ ეს მაესტრო რიშარ გალიანოს მერვე ვიზიტია საქართველოში. პირველად მუსიკოსმა 2006 წელს პროექტი „ტანგარია“ თბილისის ოპერისა და ბალეტის თეატრში ანშლაგით ჩაატარა.
გალიანოს ტრიოში მიწვეული ჰყავს ფრანგი გიტარისტი ადრიან მოინიარი, რომელმაც ბოლო წლებში ბოშური ჯაზის აღორძინებას შეუწყო ხელი. საოცარმა მოქნილობამ და შემოქმედებითმა ტალანტმა მას გზა გაუხსნა საფრანგეთის ტოპ ჯაზკლუბებში, ნიუ-იორკის არაერთ კლუბსა და მსოფლიოს სხვადასხვა ფესტივალზე.
რიშარ გალიანოს კონცერტი თბილისში არ არის მხოლოდ მუსიკალური ღონისძიება, არამედ კულტურული მოვლენაა, რომელიც მაყურებელს აკორდეონის ჟღერადობით გაჯერებულ დაუვიწყარ მოგზაურობას ჰპირდება. მელომანებს კი ეძლევათ შანსი, თანამედროვე მუსიკის ერთ-ერთი ყველაზე მნიშვნელოვან ფიგურის ცოცხალ შესრულებას მოუსმინონ.
საერთაშორისო ფესტივალ „თბილისი რიტმის“ ფარგლებში, რიშარ გალიანოს კონცერტზე დასასწრები ბილეთების შეძენა ამ ბმულზეა შესაძლებელი.
