ჰილარი დაფი მუსიკალურ კარიერას უბრუნდება

ჰილარი დაფი მუსიკალურ კარიერას ათწლიანი პაუზის შემდეგ უბრუნდება.

9 სექტემბერს Atlantic Records-მა დაადასტურა, რომ პოპ-შემსრულებელმა და Disney Channel-ის ვარსკვლავმა ახალ ლეიბლთან კონტრაქტი გააფორმა. ცნობისთვის, ჰილარი დაფის ბოლო სტუდიური ალბომი Breathe In., Breathe Out., 2015 წელს RCA Records-ის მეშვეობით გამოვიდა. მას შემდეგ კი ჰილარი დაფი ძირითადად სამსახიობო კარიერაზე იყო კონცენტრირებული, მას ეკუთვნის მთავარი როლები სერიალებში Younger და How I Met Your Father.

მუსიკალური ნამუშევრის გამოსვლის თარიღი ჯერჯერობით უცნობია, თუმცა აღსანიშნავია, რომ ჰილარი დაფის შესახებ დოკუმენტური სერიალი მზადდება, რომლის რეჟისორი და აღმასრულებელი პროდიუსერი სემ რენჩია. პრესრელიზის მიხედვით, სერიალი ჰილარი დაფის დიდი ხნის ნანატრ მუსიკალურ ინდუსტრიაში დაბრუნებასა და პირად ცხოვრებისეულ გზას ასახავს.

ჰილარი დაფი ფართო აუდიტორიამ ჯერ კიდევ 2000-იან წლებში Lizzie McGuire-ში მონაწილეობით გაიცნო, რის შემდეგაც მუსიკალურ კარიერაში წარმატებასაც მიაღწია ჰიტებით Come Clean და Wake Up, რომლებიც Billboard Hot 100-ის ტოპ-40-ში მოხვდნენ. მისი ბოლო ჩანაწერი ამ ჩარტში 2015 წელს დაფიქსირდა სიმღერით Sparks.

ჰილარი დაფის კარიერის ერთ-ერთი ყველაზე წარმატებული პერიოდი 2000-იან წლებს უკავშირდება: მისი 2003 წლის ალბომი Metamorphosis და 2005 წლის კომპილაციური ალბომი Most Wanted –  Billboard 200-ის ჩარტში პირველი ადგილზე მოხვდა. მთლიანობაში, პოპვარკსლავს Billboard 200-ში ხუთი ტოპ-10 ალბომი აქვს. Luminate-ის მონაცემებით, მხოლოდ აშშ-ში მისი ხუთი ყველაზე დიდი სტუდიური ალბომის ჯამში 7.8 მილიონი ეგზემპლარი გაიყიდა.

ჰილარი დაფის შესახებ დოკუმენტური სერიალის სახელწოდება ჯერჯერობით უცნობია. სერიალს კომპანია Next of Kin Content წარმოადგენს, რომელიც EverWonder Studio-ს ეკუთვნის. რეჟისორ სემ რენჩს კი აქამდე ისეთ მასშტაბურ მუსიკალურ პროექტებზე  უმუშავია, როგორებიც არის:  Taylor Swift: The Eras Tour და A Nonsense Christmas With Sabrina Carpenter. 

სიმბოლურია, რომ ცოტა ხნის წინ ჰილარი დაფის ჰიტ სიმღერა Wake Up-ის გამოსვლიდან 20 წელი შესრულდა.