კოლუმბიელ-ამერიკელი ვარსკვლავი Kali Uchis (ნამვილი სახელით – მარინა ლოაიზა) Billboard Latin Music Week-ის ფესტივალის მონაწილეა. Hot Latin Songs-ის ჩარტის პირველი ადგილის მფლობელი ჰიტების ავტორი ღონისძიების 2025 წლის სეზონის სპეციალური სტუმარი იქნება. ერთკვირიანი ფესტივალი 20-24 ოქტომბერს Fillmore Miami Beach-ზე ჩატარდება და არტისტი მასში მონაწილეობას კითხვა-პასუხის ფორმატში მიიღებს.
შეხვედრისას მომღერალი აუდიტორიას შემოქმედებით გზას გააცნობს, რომელიც ათწლეულზე მეტია, გრძელდება. არტისტი ისაუბრებს კარიერულ ეტაპებზე, შემოქმედებით პროცესებსა და კულტურულ გავლენებზე, რამაც ის ორენოვან მუსიკაში ერთ-ერთ მთავარ ინოვატორად აქცია.
ამჟამად Kali Uchis აშშ-ში ტურნეს ფარგლებში გამოდის, რომელიც მისი მუსიკალური კარიერის 10 წლის იუბილეს და ახალ ალბომს – Sincerely-ს ეძღვნება. მისი პირველი EP, სახელწოდებით EP Por Vida SoundCloud-ზე 2015 წელს გამოქვეყნდა. 2024 წელს კი არტისტმა ორენოვანი ნამუშევარი – Orquídeas წარადგინა, რომელიც Billboard 200 ჩარტში მე-2 ადგილზე მოხვდა. Kali Uchis ავტორია ისეთი ჰიტებისა, როგორებიცაა All I Can Say და Is It A Crime, რომლებმაც Hot R&B/Hip-Hop Songs-ის ჩარტში 24-ე და მე-11 პოზიციები დაიკავეს.
„ალბომი Sincerely ძალიან ნოსტალგიური ჟღერადობის ჩანაწერია. ის ჩემთვის განსხვავებულია, რადგან მასში ის გავლენები იგრძნობა, რომლებიც აქამდე არასდროს გამომიხატავს,“ – განაცხადა მომღერალმა Billboard Español-თან ინტერვიუში. „ალბომზე ბევრ სხვადასხვა ჟანრს აქვს გავლენა. ყველამ იცის, რომ ძველი მუსიკა მიყვარს, მაგრამ ამჯერად ალტერნატიულ ჟღერადობასაც ვიკვლევდი. ჩემი ხმა ისეთი მიმართულებებით გამოვცადე, რაც აქამდე იშვიათად გამიკეთებია.“
წლევანდელი ღონისძიების უკვე დაანონსებულ სტუმრებს შორის არიან: Anuel AA, კარინ ლეონი, DY (წარსულში ცნობილი, როგორც Daddy Yankee), გლორია და ემილიო ესტეფანები, ლაურა პაუსინი, Luis R. Conriquez, Myke Towers, Netón Vega, Óscar Maydon, Ozuna, Silvana Estrada და Xavi. მალე კიდევ მეტი არტისტის ვინაობა გახდება ცნობილი.
Latin Music Week ჩატარდება Billboard Latin Music Awards 2025-ის პარალელურად, რომელიც 23 ოქტომბერს მაიამიში გაიმართება და Telemundo-სა და Peacock-ზე პირდაპირი ეთერით გადაიცემა.
ღონისძიების ბილეთების შეძენა უკვე შესაძლებელია ვებგვერდზე: BillboardLatinMusicWeek.com.
