მას შემდეგ, რაც საზოგადოებაში ედ შირანის მიერ ინგლისის შესაძლო დატოვებაზე ალაპარაკდნენ, მუსიკოსმა ინსტაგრამ სთორიში 9 სექტემბერს მიმართვა გაავრცელა.
კვირას The 2 Johnnies-ის პოდკასტში ედ შირანმა ამერიკაში გადასვლის შესახებ კომენტარი გააკეთა და აღნიშნა, თითქოს იგი იმ ტენდენციას ეწინააღმდეგებოდა, როცა ცნობილი ადამიანები ამერიკას ტოვებენ. ედ შირანმა წამყვანებს უთხრა: „მე ახლა ამერიკაში გადასვლას ვაპირებ. ვგრძნობ, რომ შეიძლება ერთადერთი ვიყო, ვინც ამერიკაში გადადის. იქ გარკვეული ხნით გასტროლებზე მივდივარ, ოჯახი მყავს, ამიტომ ვერაფერს ვწვდები. იქ მივდივართ და იქ დავსახლდებით“.
განცხადების შემდეგ ზოგიერთმა მედიასაშუალებამ და გულშემატკივარმა ეს მიმართვა ისე აღიქვა, თითქოს იგი ინგლისის დატოვებას სამუდამოდ აპირებდა, თუმცა მუსიკოსმა 9 სექტემბერს გამოქვეყნებულ პოსტში განმარტა, რომ ეს მხოლოდ დროებითია.
„აქ ბევრად უფრო მარტივია სიტუაციაში გარკვევა, ამიტომ მინდა, დავაზუსტო. პრესა ცდილობს, გაავრცელოს ინფორმაცია, თითქოს ადამიანები ინგლისის დატოვებას ცდილობენ. მე არ მივდივარ საცხოვრებლად, ეს უბრალოდ ტურნეა, სადაც ოჯახთან ერთად მივდივარ. ლონდონიდან სან-დიეგომდე ყოველდღიურად მგზავრობა, ცხადია, ნამდვილად არ მინდა.” – განმარტა ედ შირანმა.
მან ასევე უარყო ვარაუდები, თითქოს მისი გადაწყვეტილება გადასახადებთან დაკავშირებული მიზეზებით ყოფილიყო განპირობებული: „ეს გადასახადების თემა არაა, ეს არის აშშ და არა არაბთა გაერთიანებული საემიროები. დიდ ბრიტანეთში გადასახადებს ყოველთვის გადავიხდი, რადგან აქ ვცხოვრობ.” – აღნიშნა მუსიკოსმა.
ამ ეტაპზე ედ შირანი აქტიურად ემზადება მოახლოებული Loop Tour-ისთვის, რომელიც ევროპასა და ავსტრალიაში გაიმართება. მიუხედავად ამისა, მუსიკოსს ჯერ არ გაუმხელია ჩრდილოეთ ამერიკის ტურნეს თარიღები, რომლებიც მისი ახალი ალბომის, Play-ს გამოსვლას უკავშირდება. აღსანიშნავია, რომ ალბომი ოფიციალურად 12 სექტემბერს გამოვა.
