12 სექტემბერს წინანდლის ფესტივალი სამ კონცერტს უმასპინძლებს. დილას, 12:00 საათზე, სტუმრების წინაშე ფესტივალის ფარგლებში უკვე მეორედ წარდგება ვირტუოზი პიანისტი ალექსანდრა დოვგანი. ამჯერად ის სოლო კონცერტს გამართავს, სადაც ბეთჰოვენის, შოპენისა და შუმანის ნაწარმოებებს შეასრულებს. კონცერტი წინანდლის მამულის კამერული მუსიკის დარბაზში გაიმართება.
19:00 საათზე მსმენელის წინაშე აგრეთვე უკვე ნაცნობი მუსიკოსები წარდგებიან: მევიოლინე მარკ ბუშკოვი, ჩელისტი ჯინგ ჟაო და პიანისტი ბეჰზოდ აბდურაიმოვი. სამეული ამფითეატრის სცენაზე პეტრე ჩაიკოვსკისა და ანტონინ დვორჟაკის ნაწარმოებებს შეასრულებს.
საფესტივალო დღის კულმინაცია კი ქართველი მუსიკოსების კონცერტი იქნება. 22:00 საათზე წინანდლის მამულის ამფითეატრი კატო კვარაცხელიასა და გიორგი გიგაშვილს უმასპინძლებს. ახალგაზრდა მუსიკოსები მსმენელის წინაშე წარდგებიან მათი ერთობლივი პროექტით „ადამიანის ხმა”, რომლის პრემიერაც 9 ივნისს თბილისში, ეროვნული სიმფონიური ორკესტრის დარბაზში შედგა.
„ჩემი ინსტრუმენტი, ამ შემთხვევაში გიორგისგან განსხვავებით, არის ხმა. ამიტომ ყველაზე მეტის თქმა შემიძლია ხმით,” – ამბობს Billboard საქართველოსთან საუბარში კატო კვარაცხელია.
„დღეს, ისე, როგორც არასდროს, სჭირდება არტისტს, რომ მისი ხმა გაიგონ; სჭირდება, რომ დაუკავშირდეს მსმენელსა და მაყურებელს. იმედი მაქვს, ხალხი ძალიან კარგად გაიგებს, რას ვმღერით, როგორი ხმა გვაქვს და რას ვამბობთ ამ ხმით,” – გიორგი გიგაშვილი.
კონცერტზე ქართველი კომპოზიტორების სიმღერები შესრულდება, რომლებსაც მაყურებელი სრულიად ახალი ინტერპრეტაციებითა და ჟღერადობით მოისმენს.
ნახეთ Billboard საქართველოს მომზადებული ვიდეო პროექტის პრემიერის შესახებ:
