ბარბრა სტრეიზანდი მის ერთ-ერთ ყველაზე საკულტო საეკრანო პარტნიორს იხსენებს. ჰოლივუდის ვარსკვლავი რობერტ რედფორდი 16 სექტემბერს 89 წლის ასაკში გარდაიცვალა.
ლეგენდარული მსახიობის გარდაცვალების დადასტურებიდან მალევე მომღერალმა მისი და რედფორდის 1973 წლის შავ-თეთრი ფოტო გააზიარა: “The Way We Were-ის გადაღების ყოველი დღე შთამბეჭდავი და ნამდვილი სიხარულის მომტანი იყო,” – წერს სტრეიზანდი სიდნი პოლაკის ფილმზე, სადაც ის და რედფორდი შეყვარებულ წყვილს განასახიერებენ.
„ჩვენ ისეთ განსხვავებულები ვიყავით: ის ცხენების სამყაროდან იყო, მე კი მათზე ალერგიული ვიყავი. თუმცა ვცდილობდით, ერთმანეთის შესახებ ბევრი რამ გაგვეგო, ისევე, როგორც ჩვენი გმირები ფილმში. ბობი ქარიზმატული იყო, ინტელექტუალი, ყოველთვის საინტერესო – და ასევე ერთ-ერთი ყველაზე დახვეწილი მსახიობი.”
„ბოლოს ის ლანჩზე ვნახე, სადაც ვისაუბრეთ ხელოვნებაზე და გადავწყვიტეთ, ერთმანეთისთვის ჩვენი პირველი ნახატები გაგვეგზავნა. ის უნიკალური იყო და ძალიან მადლიერი ვარ, რომ მასთან მუშაობის შესაძლებლობა მომეცა.”
მიუხედავად იმისა, რომ სტრეიზანდი და რედფორდი ტიტულოვანი მსახიობები იყვნენ, The Way We Were მათი ერთ-ერთი ყველაზე საყვარელი ფილმია. მსახიობები ერთმანეთისგან სრულიად განსხვავებულ პერსონაჟებს თამაშობენ, რომლებსაც, მიუხედავად განსხვავებებისა, ერთმანეთი იზიდავთ. ფილმმა სტრეიზანდ საუკეთესო ორიგინალური სიმღერის კატეგორიაში ოსკარი მოუტანა.
„ძალიან სახალისო იყო ბობთან მუშაობა,” – წერდა სტრეიზანდი რედფორდზე 2023 წლის მემუარებში My Name Is Barbra. “მე და მას ნამდვილი ქიმია გვქონდა და მაყურებელი ამას გრძნობდა. რთულია, ახსნა, თუ რატომ მუშაობს მსახიობთა გარკვეული წყვილი, მაგრამ ერთ-ერთ ინტერვიუში ბობი ამის ახსნას ეცადა. ის ამბობდა: ‘ბარბრას ქალურობა კაცში მამაკაცურობას, ხოლო მისი მამაკაცური მხარე კაცის ქალურ თვისებებს ამჟღავნებს – მოწყვლადობას, რომანტიზმს, რაც გინდათ ის დაარქვით.’ არ არის გასაკვირი, რომ მომწონდა. ის ძალიან გამჭრიახია,” – წერს სტრეიზანდი.
მსახიობის გარდაცვალების შესახებ გავრცელებულ განცხადებაში ვკითხულობთ, რომ რედფორდი იუტაში, საკუთარ სახლში, ოჯახურ გარემოში გარდაიცვალა.
რედფორდის სამსახიობო კარიერა არაერთ ცნობილ ფილმს მოიცავს, მათ შორისაა Butch Cassidy and the Sundance Kid და All the President’s Men. მსახიობს ხუთჯერ აქვს მიღებული ოქროს გლობუსი და არის ოსკარის მფლობელი საუკეთესო რეჟისორის ნომინაციაში ფილმისთვის Ordinary People.
