8 ივლისს, მოცეკვავე დიანდრე ბლუმ და ქორეოგრაფმა კრისტოფერ გრანტმა, რომლებიც ატლანტაში ბიონსესთან ერთად ტურნეზე იმყოფებოდნენ, პოლიციას მიმართეს, რომ მათი ავტომობილი გატეხეს. ბლუმ და გრანტმა სამართალდამცველებს უთხრეს, რომ მანქანას ფანჯარა ჰქონდა ჩამტვრეული და მოპარული იყო ორი ჩემოდანი, სადაც „პირადი და კონფიდენციალური ინფორმაცია“ ინახებოდა.
პოლიციის ანგარიშში წერია, რომ მოპარულ სათავსოში იყო ორი Apple-ის ლეპტოპი და ხუთი მეხსიერების ბარათი, რომლებშიც ბიონსეს „გამოუქვეყნებელი მუსიკა“ და ტურნესთან დაკავშირებული სხვა ციფრული ფაილები ინახებოდა. ატლანტის პოლიციამ პრეს-რელიზში დაადასტურა, რომ ნივთები ჯერ კიდევ არ არის ნაპოვნი.
Billboard-მა მოიპოვა იურიდიული დოკუმენტები, რომლითაც დასტურდება, რომ ერთ პირს – კელვინ ევანსს ბრალი წაუყენეს ავტომობილში ან სხვა სატრანსპორტო საშუალებაში ძალით შეღწევის მუხლით. ევანსის გირაო 20 000 დოლარით განისაზღვრა, წინასასამართლო სხდომა ამ კვირაში გაიმართება. ატლანტის პოლიციის ვებ-გვერდზე წერია, რომ ევანსი პოლიციამ 26 აგვისტოს დააკავა.
Cowboy Carter Tour-მა ივლისში რვა კონცერტიდან 102.3 მილიონი დოლარის შემოსავალი მიიღო. ივლისის შოუებზე სულ 392 000 ბილეთი გაიყიდა.
