Tatuza Jazz Club – ეს არის ქალაქის უახლესი კულტურული სივრცე, რომელიც ქართველი ჯაზ ლეგენდის, თამაზ „თათუზა“ ყურაშვილის სახელს უკავშირდება.
16 სექტემბერს, 21:00 საათზე, Tatuza Jazz Club-მა პირველად უმასპინძლა დამსწრე საზოგადოებას. საღამო მსოფლიო მასშტაბის ჯაზ ვარსკვლავებმა, სტენლი კლარკმა, ბექა გოჩიაშვილმა და დენის ჩემბერსმა დაუვიწყარი კონცერტით გახსნეს.
ბექა გოჩიაშვილი, მუსიკოსი:
„ყველაზე მთავარი, რაც მინდა, რომ ვთქვა ამ ჯაზ კლუბთან დაკავშირებით, არის ის, რომ მისი სახელი თამაზ ყურაშვილს – თათუზას უკავშირდება. თათუზა არის სიმბოლო საქართველოში ჯაზის დაბადების. მისგან ჩემთვის გაწეული ძალიან დიდი ამაგი მახსოვს, როგორც მუსიკალური, ისე მის მიღმა. ჩვენ მეგობრებიც ვიყავით, მისთვის ასაკს არ ჰქონდა მნიშვნელობა. საერთოდ, ჯაზში ასე ხდება ხოლმე. ის იყო ნამდვილი ჯაზმენი, რომელმაც იცოდა მუსიკის ფასი. მადლობა ჩემს მეორე უფროს მეგობარს, თათუზას და მთელ თბილისში ჯაზ მუსიკოსების სახელით – გიორგი რამიშვილს, რომელმაც ეს სივრცე გახსნა, რადგან ეს არ არის ერთჯერადად გაკეთებული საქმე, ეს უკავშირდება მუსიკოსებს, მთელ საქართველოს და მოხარული ვარ, რომ ამის ნაწილი გავხდი. ალბათ იცით, რომ სტენლი კლარკთან ერთად დიდი ხანია, ვუკრავ, რითაც ძალიან ბედნიერი ვარ. ჩვენთან ერთად ასევე დაუკრავს ჩემი საყვარელი დრამერი დენის ჩემბერსი. შეიძლება ითქვას, თავიანთ საქმეში ეს მუსიკოსები არიან პელე და მარადონა.”
Tatuza Jazz Club-ის გახსნა ქართული ჯაზ მუსიკის ცხოვრებაში ერთგვარ გარდამტეხ მოვლენად შეიძლება მივიჩნიოთ. კლუბი თვის განმავლობაში 30-მდე ღონისძიებას უმასპინძლებს, რაც ქართველ შემსრულებლებსაც ფართო მუსიკალურ გზას გაუხსნის.
ბექა გოჩიაშვილი, მუსიკოსი:
„Tatuza Jazz Club, როგორც თათუზას და მის მუსიკას ეკადრებოდა, ისე გაიხსნება და უკვე შემდეგში დაუკრავენ ლუკა თოფურია, ხატია ქორიძე, რეზო კიკნაძე და სხვა მუსიკოსები. ეს არის სტაბილურობის საწყისი საქართველოში, რასაც გვპირდება ეს კლუბი, ვიზუალურადაც ძალიან მომწონს. ამ ტიპის ჯაზ კლუბი საქართველოში ჯერ არ ყოფილა და ეს ძალიან მახარებს, განსაკუთრებით იმის გამო, რომ მისი სახელი თათუზას უკავშირდება. ყოველთვის ვფიქრობდი, რომ თათუზა ის ადამინია, რომელიც არასდროს მოკვდება და ამ ჯაზ კლუბის გახსნით ამაში კიდევ ერთხელ დავრწმუნდი. აქ გაიზრდებიან თაობები, გავა დრო და ჩემი შემდეგი თაობაც აქ დაუკრავს. იმედი მაქვს, რომ მომავალში ჩემისთანა და ჩემზე უკეთესი ახალგაზრდები გაიზრდებიან და ეს ჯაზ კლუბი ხელს შეუწყობს მათ განვითარებას.“
ლეგენდარულმა მუსიკოსებმა თათუზას ჯაზ კლუბში თავბრუდამხვევი ჰანგებით მსმენელს დაუვიწყარი საღამო აჩუქეს.
აღსანიშნავია, რომ კლუბი უამრავ საინტერესო მუსიკალურ ღონისძიებას უმასპინძლებს, რომლის ფარგლებში ამერიკელი და ევროპელი რეზიდენტი ბენდების გვერდით საერთაშორისო ვარსკვლავები და ქართველი არტისტები წარდგებიან. მრავალფეროვანი მუსიკალური პროგრამა, ავთენტური ჯაზ სცენისთვის დამახასიათებელი სივრცე და მსოფლიოში ცნობილი არტისტები თბილისის კიდევ ერთ ახალ მუსიკალურ ცხოვრებას მნიშვნელოვან სივრცეს შემატებს.
Tatuza Jazz Club-ის კონცერტების სერიის სანახავად და ბილეთების შესაძენად ეწვიეთ ბმულს.
