Disney-მ ოფიციალურად დააანონსა, რომ დემი ლოვატო და Jonas Brothers მუსიკალური კოლექტივის სახით ბრუნდებიან, რათა გააცოცხლონ ცნობილი ფრენჩაიზის მესამე ნაწილი, რომელმაც ისინი ვარსკვლავებად აქცია.
ჯო, ნიკი და კევინ ჯონასები კვლავ შეასრულებენ ძმები გრეების როლებს და დემი ლოვატოსთან ერთად Camp Rock 3-ის აღმასრულებელი პროდიუსერებიც იქნებიან. ოფიციალური განცხადების მიხედვით, დაანონსებული პროექტის გადაღებები უკვე დაიწყო. კარგად ნაცნობ ვარსკვლავებს ახალი თაობის მსახიობებიც შეუერთდებიან. ფილმში დაბრუნდება მარია კანალს-ბარერა, რომელმაც ორიგინალებში ლოვატოს პერსონაჟის დედა შეასრულა.
პირველი Camp Rock Disney Channel-ზე 2008 წელს გამოვიდა და სწორედ ამ ფილმმა აქცია ლოვატო და Jonas Brothers თინეიჯერების კუმირებად. ფილმის გამოსვლის შემდეგ მათ ერთად მოაწყვეს ტურნე, ხოლო 2010 წელს პროექტის გაგრძელებაც – Camp Rock 2: The Final Jam გადაიღეს.
15 წლის შემდეგ Camp Rock-მა საკუთარი ადგილი დაიმკვიდრა Disney Channel-ის პროექტებს შორის. ამას მოწმობს ისიც, რომ სულ რამდენიმე კვირის წინ ფილმის საუნდტრეკის მოსმენებმა სტრიმინგ სერვისებზე მკვეთრად მოიმატა, როდესაც ლოვატო Jonas Brothers-ს პირველად შეუერთდა ნიუ-ჯერსიში, ტურნეს გახსნის კონცერტზე. მათ ერთად შეასრულეს This Is Me და Wouldn’t Change a Thing. სწორედ ამ მოულოდნელი გამოსვლის წინ, Hot Ones Versus-ის ეთერის დროს ჯო ჯონასმა შემთხვევით გაამხილა, რომ Camp Rock 3-ის სცენარი უკვე არსებობდა.
„Read Camp Rock 3,” – წაიკითხა ჯო ჯონასმა საკუთარ ტელეფონში, როდესაც შოუს წამყვანებმა სთხოვეს, ბოლო ჩანაწერი გაეზიარებინა ჩანაწერების აპლიკაციიდან. „ეს სიმართლეა! ბოდიში, Disney!“ – დაამატა მან.
