ბობ დილანი ფესტივალ Farm Aid 40-ის საკულტო შემსრულებელთა სიას შეუერთდა. ღონისძიება 20 სექტემბერს მინეაპოლისში, Huntington Bank Stadium-ზე გაიმართება. ფესტივალის ჰედლაინერები იქნებიან Farm Aid-ის სამეთვალყურეო საბჭოს წევრები – უილი ნელსონი, ჯონ მელენკამპი, ნილ იანგი, დეივ მეთიუსი და მარგო პრაისი. მათთან ერთად სცენაზე გამოვლენ კენი ჩესნი, ბილი სტრინგსი, ნეითანილ რეიტლიფი & The Night Sweats, ლუკას ნელსონი და სხვა არტისტები. ლაინაფში ასევე ვხვდებით ისეთ შემსრულებლებს, როგორებიც არიან: Trampled by Turtles, უაინონა ჯადი, სტივ ერლი, Waxahatchee, ერიკ ბარტონი (Black Pumas), ჯესი უელსი, მედელინ ედვარდსი და Wisdom Indian Dancers.
ბობ დილანი 2025 წლის ზაფხულის სეზონზე უილი ნელსონთან ერთად მოგზაურობს Outlaw Music Festival-ის ფარგლებში. ბოლოს ის Farm Aid-ის სცენაზე 2023 წლის 23 სექტემბერს გამოვიდა. Farm Aid ამერიკის დამოუკიდებელი ფერმერების უფლებებს უკვე ოთხი ათეული წელია იცავს და დილანის მონაწილეობა ამ ისტორიას სიმბოლურად უკავშირდება.
ყველაფერი 1985 წლის 13 ივლისს დაიწყო, როცა დილანმა ფილადელფიაში, Live Aid-ის კონცერტზე სცენიდან თქვა: „ამ ღონისძიებით შეგროვებული თანხიდან მცირედი ნაწილი, თუნდაც ერთი ან ორი მილიონიც კი შეიძლება, აქაური ფერმერების ვალების დაფარვას მოხმარებოდა.”
უილი ნელსონმა მოგვიანებით Billboard-ს უთხრა: „ეს სიტყვები მეხის გავარდნასავით იყო.“ სულ ექვს კვირაში ნელსონმა ორგანიზება გაუკეთა პირველ Farm Aid-ს, რომელიც 1985 წლის 22 სექტემბერს, ილინოისში ჩატარდა.
პირველივე ფესტივალზე დილანი ისეთ დიდ სახელებთან ერთად გამოვიდა, როგორებიც იყვნენ ჯონი ქეში, ჯონ ფოგერტი, დონ ჰენლი, ბილი ჯოელი, ლორეტა ლინი, როი ორბისონი, ბონი რეიტი და ტომ პეტი & The Heartbreakers. სწორედ აქედან დაიწყო დილანის მჭიდრო თანამშრომლობა ტომ პეტთან და ეს კოლაბორაცია მოგვიანებით Traveling Wilburys-ის ჩამოყალიბებაშიც გადაიზარდა.
„დილანს სჭირდებოდა ბენდი პირველი Farm Aid-ისთვის,“ – იხსენებს მუსიკალური ჟურნალისტი და პეტის ბიოგრაფი ბილ დე იანგი 2017 წელს. „ყველაფერი სწორედ აქედან დაიწყო.“
დილანმა და პეტმა 1986 წელს ერთად დაიწყეს True Confessions Tour. ტურნემ 60-მდე კონცერტი გააერთიანა ავსტრალიაში, იაპონიასა და აშშ-ში – მათ შორის ვაშინგტონის RFK სტადიონზე და Madison Square Garden-ში.
1986 წლის 4 ივლისს არტისტები დისტანციურად ჩაერთნენ მეორე Farm Aid-ში. ეს მეგობრობა შემოქმედებით პარტნიორობად იქცა: 1988 წელს დილანმა მალიბუს სტუდიაში მიიწვია პეტი, ჯორჯ ჰარისონი, ჯეფ ლინი და როი ორბისონი. ჩანაწერი Handle Me With Care საბოლოოდ ე.წ. სუპერბენდის – The Traveling Wilburys-ის დაბადების მიზეზი გახდა.
როგორც საბოლოოდ აღმოჩნდა, Farm Aid-ის მეშვეობით ბობ დილანმა იპოვა როგორც ძლიერი ტურნეს პარტნიორი, ასევე წარმატებული მუსიკალური კოლაბორაცია. ახლა კი, 40 წლის შემდეგ, დილანი კვლავ დაუბრუნდება სცენას, რათა მხარი დაუჭიროს იმ ფერმერებს, რომელთა დაცვაზეც პირველად სწორედ 1985 წელს, Live Aid-ის სცენიდან ისაუბრა.
