შონ კომბსს 50 თვით თავისუფლების აღკვეთა შეეფარდა მას შემდეგ, რაც პროსტიტუციაში ჩართვის მიზნით ტრანსპორტირების ბრალდებით ორ ეპიზოდში ცნეს დამნაშავედ. ინფორმაციას CNN ავრცელებს.
განაჩენი 3 ოქტომბერს ნიუ-იორკის სასამართლოში მოსამართლე არუნ სუბრამანიანმა გამოაცხადა. მან კომბსს ასევე დააკისრა 500 000 დოლარის ოდენობის ჯარიმა. ეს არის მაქსიმალური თანხა, რაც ამ შემთხვევაში შეიძლებოდა მსჯავრდებულს დაკისრებოდა.
სასჯელის გამოტანამდე მოსამართლემ აღნიშნა, რომ გაითვალისწინებდა პროცესში მონაწილე „მსხვერპლებს“, მათ შორის კასანდრა ვენტურას და მამაკაც სექს-მუშაკებს. ასევე კომბსის ქცევას მას შემდეგ, რაც იგი უფრო მძიმე ბრალდებებში, მათ შორის რეკეტირებასა და სექს-ტრეფიკინგში გამართლდა.
Diddy-ს დაცვის მხარემ მოსამართლეს წარუდგინა ემოციური ვიდეო, სადაც კომბსი ნიუ-იორკის ახალგაზრდობას ესაუბრება, ქველმოქმედებაში მონაწილეობს და ყოფილი პარტნიორის, კიმ პორტერის გარდაცვალებას გლოვობს. მან ასევე დაწერა წერილი, რომელშიც მომხდარს ნანობს.
„ბოლო ცამეტ თვეში პირველად მომიწია სარკეში ასე ჩახედვა. ჩემი ტკივილი გახდა ჩემი მასწავლებელი. ჩემი სევდა იყო ჩემი მამოძრავებელი ძალა. უნდა ვაღიარო, ჩემი დაცემა ჩემი ეგოიზმის შედეგი იყო. სცენები და კადრები, სადაც კესიზე ვიძალადე, ყოველდღე მიტრიალებს გონებაში. აბსოლუტურად არასწორი იყო, რომ ხელი აღვმართე იმ ქალზე, რომელსაც ვუყვარდი. ამის გამო ბოდიშს ვიხდი და მუდამ მოვინანიებ.“
მიუხედავად იმისა, რომ Diddy თითქოს გულწრფელ სინანულს გამოთქვამს, ვენტურამ თავადაც მიმართა სასამართლოს და დააფიქსირა საკუთარი პროტესტი, რათა მსჯავრდებული ვადაზე ადრე არ გათავისუფლებულიყო. მან კომბსს „მანიპულატორი, აგრესორი, მოძალადე“ უწოდა. ამასთან, Diddy-ს მხარდაჭერა გამოუცხადეს როგორც ოჯახმა, ასევე ცნობილმა სახეებმა, მათ შორის პროდიუსერმა დალას ოსტინმა, რომელიც სასამართლო პროცესსაც დაესწრო. ასევე კომბსისადმი მხარდაჭერა ღიად გამოხატა რეპერის ყოფილმა შეყვარებულმა იანგ მაიამიმ, რომელმაც სასამართლოს წერილობით მიმართა.
