50 Cent შონ კომბსის დაცინვას აგრძელებს. ხოლო მას შემდეგ, რაც 6 ოქტომბერს დონალდ ტრამპმა ჟურნალისტებს განუცხადა, რომ Diddy-ს გუნდს მასთან შეწყალების საკითხზე ჰქონდა საუბარი, 50 Cent-მა გადაწყვიტა, პრეზიდენტისთვის შეეხსენებინა ის დამამცირებელი კომენტარები, რომლებიც შონ კომბსს წარსულში ტრამპის შესახებ უთქვამს.
50 Cent-ის მიერ სოციალურ ქსელში ატვირთული ვიდეო შეიცავდა Diddy-ს ძველ განცხადებებს, რომლებშიც ის ტრამპს 2020 წლის არჩევნების შემდეგ აკრიტიკებს. ერთ-ერთ ფრაზაში Diddy ამბობს: „თეთრკანიანები, როგორიცაა ტრამპი, უნდა განიდევნონ… უპირველესი პრიორიტეტი ტრამპის ოფისიდან გაშვებაა.“
ტრამპმა აგვისტოში Newsmax-თან ინტერვიუში თქვა, რომ ადრე მას და Diddy-ს კარგი ურთიერთობა ჰქონდათ, თუმცა რეპერი მას შემდეგ განეწყო მის წინააღმდეგ, რაც ტრამპმა პოლიტიკაში წასვლა და საპრეზიდენტო არჩევნებში ჩართვა გადაწყვიტა. „ძალიან მეგობრულად ვიყავით ერთმანეთთან და კარგი ადამიანი ჩანდა. ახლოს არ ვიცნობდი, მაგრამ როცა არჩევნებში მივიღე მონაწილეობა, ძალიან მტრულად განეწყო,“ – აღნიშნა დონალდ ტრამპმა.
Diddy-ს სასამართლო პროცესი 3 ოქტომბერს დასრულდა, რის შემდეგაც კომბსს 50-თვიანი პატიმრობა მიესაჯა სექსმომსახურების შესახებ ფედერალური კანონების დარღვევისთვის.
6 ოქტომბერს თეთრ სახლში, ჟურნალისტებთან საუბრისას, ტრამპმა დაადასტურა, რომ კომბსმა და მისმა გუნდმა შეწყალების თხოვნით მართლაც მიმართეს: „ბევრ ადამიანს უთხოვია ჩემთვის შეწყალება. მე მას Puff Daddy-ს ვეძახი,“ – თქვა ტრამპმა, – „ის ჩემგან შეწყალებას ითხოვს.“
ჯერ კიდევ მაისში ტრამპმა თქვა, რომ შეწყალების საკითხზე „ფაქტებს გადაამოწმებდა“, თუმცა ასევე აღნიშნა, რომ მათ შორის ურთიერთობის გაფუჭება ამ გადაწყვეტილების მიღებას „უფრო გაართულებდა“.
50 Cent-მა Diddy-ს მაშინაც დასცინა, როცა 50-თვიანი განაჩენი გამოცხადდა. მან ინსტაგრამზე გამოაქვეყნა სასამართლო პროცესის სკეტჩი, სადაც აცრემლებული Diddy ჩანდა, თუმცა შემდეგ ეს პოსტი წაშალა.
„ჰეი, ვინც Diddy-ს საჯარო გამოსვლებზე იწვევდა – გავიგე, რომ ვეღარ შეძლებს მოსვლას,” – დაწერა 50 Cent-მა სოციალურ ქსელში.
