ზაკ ბრაიანმა, როგორც ჩანს, აშშ-ის მთავრობა გაანაწყენა თავისი ახალი სიმღერით, რომელიც ჯერ არ გამოსულა.
რამდენიმე დღის წინ მუსიკოსმა სოციალურ ქსელში მომავალი სიმღერის პატარა მონაკვეთი გაავრცელა, რომელშიც აშშ-ის საიმიგრაციო და საბაჟო დეპარტამენტი ფიგურირებს – „ICE მოვა და კარს ჩამოგიღებს,” – მღერის ბრაიანი. ტექსტს 4 დღის შემდეგ თეთრი სახლის წარმომადგენელი აბიგაილ ჯექსონი საპასუხო განცხადებით გამოეხმაურა. მიუხედავად იმისა, რომ შესაძლოა ჯექსონი აღნიშნული სიმღერის ფანი არ იყოს, მისმა განცხადებამ აჩვენა, რომ ის კარგად იცნობს მუსიკოსის შემოქმედებას და იცის ბრაიანის სიმღერები, რომელთა სახელწოდებებიც თავის განცხადებაში ჩააქსოვა.
„მაშინ, როცა ზაკ ბრაიანს სურს ‘ჭიშკრების გახსნა’ (ბრაიანის სიმღერა Open the Gates) კრიმინალი არალეგალებისთვის და გმობს ICE-ის გმირ ოფიცრებს, ‘რაღაც’ (სიმღერა Something in the Orange) მკარნახობს, რომ ამერიკელების უმრავლესობა მას არ ეთანეხმება და მხარს უჭერს პრეზიდენტი ტრამპის დიდ ამერიკულ გამოცოცხლებას”, – აღნიშნავს ჯექსონი. ღმერთი შენკენ (სიმღერა Godspeed), ზაკ!”
მომავალი სიმღერის გაზიარებული მონაკვეთის აღწერაში ბრაიანი წერდა: „წითელის, თეთრისა და ლურჯის გახუნება.”
მიუხედავად იმისა, რომ არტისტი უწინ დონალდ ტრამპთან ერთად ფოტოკამერის წინ პოზირებდა, ახლა, როგორც ჩანს, ის ერთ-ერთი მათგანია, ვინც თეთრი სახლის მასობრივი დეპორტაციის პოლიტიკას აპროტესტებს. აშშ-ის საიმიგრაციო სამსახურის რეიდების წინააღმდეგ არაერთ სხვა არტისტსაც უსაუბრია.
აბიგაილ ჯექსონი არ არის მთავრობის ერთადერთი წარმომადგენელი, რომელიც ბრაიანის ახალ სიმღერას გამოეხმაურა. აღნიშნულზე კომენტარი გააკეთა აშშ-ის საშინაო უსაფრთხოების დეპარტამენტის წარმომადგენელმაც: „‘ვარდისფერ ცაზე’ (ბრაიანის სიმღერა Pink Skies) დარჩი, ძმაო.”
