კევინ ფედერლაინი დაანონსებულ მემუარებში სპირსის დედობისა და ფსიქიკური ჯანმრთელობის შესახებ საუბრობს. მემუარები, სახელწოდებით – You Thought You Knew – 21 ოქტომბერს გამოვა.
როგორც The New York Times-მა 14 ოქტომბერს გამოაქვეყნა, წიგნში ფედერლაინი წერს შიშზე, რომ მისი ყოფილი მეუღლის მდგომარეობა კვლავ საფრთხეშია და სვამს კითხვას – იყო, თუ არა 2021 წელს მეურვეობის შეწყვეტა სწორი გადაწყვეტილება.
„სიმართლე ისაა, რომ ბრიტნის მდგომარეობა ისეთი მიმართულებით მიდის, საიდანაც, შესაძლებელია, ვეღარ დაბრუნდეს,“ – აღნიშნავს ის ერთ-ერთ თავში. „აღარ არის გამართლებული იმის თქმა, თითქოს ყველაფერი რიგზეა. ჩემი პერსპექტივიდან ჩანს, რომ დრო იწურება. თუ არაფერი შეიცვლება, ცუდი რამ მოხდება და ყველაზე მეტად მეშინია, რომ ბოლოს ჩვენს შვილებს მოუწევთ ამ შედეგთან გამკლავება.“
სპირსი და ფედერლაინი 2004 წელს დაქორწინდნენ და 2007-ში განქორწინდნენ. მათ ორი შვილი – 20 წლის შონი და 19 წლის ჯეიდენი ჰყავთ.
წიგნის სხვა მონაკვეთში ფედერლაინი ამტკიცებს, რომ სპირსი შვილების მიმართ შემაშფოთებელ ქცევას ავლენდა. მისი თქმით, „ბავშვებს ზოგჯერ ღამით ეღვიძებოდათ და ხედავდნენ, რომ ის ჩუმად იდგა კარის ზღურბლთან, დანით ხელში და უყურებდა მათ ძილში. შემდეგ კი უბრალოდ ტრიალდებოდა და მიდიოდა, ყოველგვარი განმარტების გარეშე.“
ბრიტნი სპირსის წარმომადგენელმა ეს ბრალდებები Billboard-ისთვის გაზიარებულ განცხადებაში უარყო:
„კევინის წიგნის გამოქვეყნებასთან ერთად, კვლავ გრძელდება მცდელობა, რომ [ბრიტნის ხარჯზე] ფინანსური სარგებელი მიიღოს,“ – წერია განცხადებაში. „სამწუხაროა, რომ ეს ხდება მას შემდეგ, რაც ბავშვების ალიმენტი დასრულდა. ბრიტნისთვის მთავარი კვლავ მის შვილებზე – შონ პრესტონზე და ჯეიდენ ჯეიმსზე ზრუნვაა. თავის მემუარებში (The Woman in Me) მან თავადაც გულწრფელად აღწერა საკუთარი გზა.“
ფედერლაინის წიგნი გაყიდვაში 21 ოქტომბრიდან გამოვა. იმავე საღამოს ერთადერთ სატელევიზიო ინტერვიუს Entertainment Tonight-თან ჩაწერს. წინასწარ გამოქვეყნებულ თიზერში ფედერლაინი ამბობს, რომ მისთვის ყოფილი ცოლის ფსიქიკური პრობლემები ნამდვილი განგაშის ზარია.
„არასდროს, არც ერთხელ ვყოფილვარ ბრიტნის წინააღმდეგ. მხოლოდ იმას ვცდილობდი, რომ ჩემს შვილებს დედასთან კარგი ურთიერთობა ჰქონოდათ. როცა ყველაფერს ვაანალიზებ, ვხვდები, რომ ჩემი შვილები საერთოდ არ იცნობენ ქალს, ვისზეც ოდესღაც ვიქორწინე. ორი ათწლეულია, ამ ხიდის აშენებას ვცდილობ.“
ფედერლაინის განცხადებების პარალელურად, სპირსი საჯაროდ საუბრობს შვილებთან ურთიერთობის აღდგენაზე. განქორწინების შემდეგ ბავშვებზე მეურვეობა მამას ჰქონდა და 2023 წელს ფედერლაინთან ერთად ჰავაიზე გადავიდნენ საცხოვრებლად.
2024 წლის შობის დღეს ბრიტნიმ სოციალურ ქსელში დაწერა, რომ წლების შემდეგ პირველად შეძლო ჯეიდენთან დროის გატარება: „ყველაზე ბედნიერი შობა ჩემს ცხოვრებაში!!! ორი წელია, ჩემი ბიჭები არ მინახავს!!! სიხარულის ცრემლები, მადლიერება და სრული შოკი – ასეთი ბედნიერი ვარ!!! მადლობა, ღმერთო!!!“
გასულ წელს მომღერალმა ჯეიდენთან ერთად დამატებით რამდენიმე საერთო ფოტოც გააზიარა.
