15 ოქტომბერს მოდის სამყაროს ერთ-ერთი ყველაზე სანახაობრივი მოვლენა, Victoria’s Secret-ის ჩვენება გაიმართა. წელს შოუზე გამოვიდა მსოფლიო მოდის სცენაზე ცნობილი ქართველი მოდელი მატილდა გვარლიანი. ეს მისთვის Victoria’s Secret-ის მეორე ჩვენება იყო – მოდელის დებიუტი VS-ის პოდიუმზე 2024 წელს შედგა.
Victoria’s Secret/ Youtube
შოუს ერთ-ერთი ტრადიციული ელემენტი მუსიკალური გაფორმებაა – მოდელების გამოსვლის პარალელურად, აუდიტორიის წინაშე მოწვეული შემსრულებლები წარდგებიან. წელს ერთ-ერთი მონაწილე იყო K-pop-ის გოგონების ჯგუფი – TWICE. ჯგუფის ოთხი წევრი – ნაიონი, ჯიჰიო, ცზიუი და მომო Victoria’s Secret-ის პოდიუმზე მუსიკალური ნომრებით გამოვიდნენ. შოუ გაიხსნა სიმღერით „This Is For“ – მათი მეოთხე ალბომის ცნობილი ტრეკით, რომელიც ივლისში გამოვიდა. ტექსტი იდეალურად ეხმიანებოდა ქალებისადმი მიძღვნილ ჩვენებას – ფრაზები თითქოს სწორედ იმ საღამოსთვის იყო დაწერილი.
შემდეგ ჯგუფმა შეასრულა სინგლი „Strategy“, რომელიც იმავე სახელწოდების EP-შია შეტანილი. ორივე ნომერში TWICE-ის წევრებმა Victoria’s Secret-ის ქვებრენდის – PINK-ის ლუქები მოირგეს. მათთან ერთად პოდიუმზე გამოვიდნენ მოცეკვავეები და მოდელები, რომლებმაც PINK-ის ახალგაზრდული და ყოველდღიური სტილის კოლექცია წარადგინეს.
ამავე საღამოს სცენაზე ვიხილეთ KAROL G, Madison Beer და Missy Elliott.
რაც შეეხება TWICE-ს, ჯგუფმა უკვე დააანონსა მსოფლიო ტური – This Is For 2026, რომელიც ჩრდილოეთ ამერიკაში, ევროპასა და გაერთიანებულ სამეფოში გაიმართება.
