კანიე უესტთან განქორწინების შემდეგ კიმ კარდაშიანი პირველად საუბრობს ღიად იმ სირთულეებზე, რაც მენტალური ჯანმრთელობის პრობლემების მქონე ადამიანთან ქორწინებას ახლდა.
პოდკასტ Call Her Daddy-ს 15 ოქტომბრის ეპიზოდში სტუმრობისას Skims-ის დამფუძნებელმა დაწვრილებით ისაუბრა კანიე უესტთან ურთიერთობის დეტალებზე. ქორწინების განმავლობაში და მას შემდეგაც კანიე უესტი ხშირად ავლენდა არასტაბილურ ქცევას, დაწყებული ანტისემიტური განცხადებებით X-ზე თუ ინტერვიუებში, დამთავრებული ყოფილი მეუღლისადმი ბრალდებებით, თითქოს ის მათი შვილების „გატაცებას“ ცდილობდა.
„ვფიქრობ, როცა ვიღაცას პირველი მენტალური კრიზისი აქვს, გსურს, მხარი დაუჭირო, დაეხმარო გზის პოვნაში, მაგრამ თუ ადამიანი არ არის მზად ამ ცვლილებებისთვის, რომელიც, ჩემი აზრით, მისთვის სასარგებლო და ჯანსაღი იქნებოდა, ურთიერთობა შეიძლება ტოქსიკურადაც იქცეს.“ – უთხრა კარდაშიანმა წამყვან ალექს კუპერს და იქვე დასძინა:
„როცა შვილები გყავს, წასვლა კიდევ უფრო რთულია, ეს ყველას ცხოვრებას ცვლის სამუდამოდ. როცა მიხვდები, რომ არაფერი შეიცვლება უკეთესობისკენ, უნდა მიიღო სერიოზული გადაწყვეტილება, როგორ გააგრძელო ცხოვრება. ეს ძალიან მძიმე რეალობაა, რომლის მიღებაც ადვილი არ არის.“
კიმ კარდაშიანი და კანიე უესტი 2014 წელს დაქორწინდნენ, მათ ოთხი შვილი ჰყავთ: ნორთი, სეინთი, ჩიკაგო და ფსალმი. 2016 წელს კანიე იძულებით მოათავსეს საავადმყოფოში მას შემდეგ, რაც უძილობისა და გაუწყლოების შედეგად ფსიქიკური ჯანმრთელობის პრობლემები დაეწყო.
თუმცა, სანამ წყვილი ჯერ კიდევ ქორწინებაში იყო, კიმ კარდაშიანის თქმით, ხშირად გრძნობდა თავს დაუცველად: „ვგრძნობდი, რომ არ ვიყავი უსაფრთხოდ. არა მხოლოდ ფიზიკურად, არამედ ემოციურად და ფინანსურადაც,“ – აღნიშნა კარდაშიანმა.
„დაახლოებით ხუთი ლამბორგინი გვყავდა, ერთ-ერთი კრიზისის დროს, მახსოვს, სახლში როცა დავბრუნდი, მანქანები აღარ დამხვდა. როცა ვიკითხე, სად იყო მანქანები, ან ჩემი ახლად შეძენილი მანქანა სად გაქრა, მან მიპასუხა, რომ მეგობარს აჩუქა.” – გაიხსენა პოდკასტ Call Her Daddy-ში კიმ კარდაშიანმა.
დაშორების შემდეგ, კარდაშიანი პიტ დევიდსონს ხვდებოდა, რომელსაც კანიე უესტმა რამდენჯერმე ონლაინ სივრცეში საჯაროდ დასცინა. ერთ მომენტში რეპერმა მუსიკალური ვიდეო გამოსცა, სადაც ანიმაციაში ჩანს, თუ როგორ მარხავს Saturday Night Live-ის ყოფილი მსახიობის, პიტ დევიდსონის თავს.
„ამ ყველაფერზე ძალიან მწყდებოდა გული, ეს არ იყო პიტის მიმართ სამართლიანი მოქცევა, განვიცდიდი და ზუსტად ვხვდებოდი, რას გრძნობდა ის, საშინელ მდგომარეობაში აღმოჩნდა. ამის შემდეგ ყველასთან დისტანცია დავიჭირე. არ მინდა, ვინმე მსგავს სიტუაციაში აღმოჩნდეს. ზოგჯერ მარტივია, უბრალოდ შორს დაიჭირო თავი, თუმცა ასე ცხოვრება თითქმის შეუძლებელია.” – აღნიშნა კიმ კარდაშიანმა.
კიმის თქმით, დღესდღეობით მთელი ყურადღება შვილების აღზრდაზე აქვს გადატანილი და იმედს იტოვებს, რომ ოდესმე შეძლებს კანიე უესტთან ჯანმრთელი ურთიერთობის ჩამოყალიბებას. თუმცა, მისივე თქმით, უკანასკნელი რამდენიმე თვეა, მის ოჯახს რეპერთან არავითარი კავშირი არ ჰქონია.
მიუხედავად იმისა, რომ ძალიან რთული იყო განქორწინება, კარდაშიანი დარწმუნებულია, რომ სწორი გადაწყვეტილება მიიღო.
„საკუთარი თავი უნდა გადამერჩინა, რათა უკეთესი დედა ვყოფილიყავი. ვფიქრობ, როცა ბავშვები გაიზრდებიან, შეძლებენ ამის გაგებას.“ – თქვა კიმმა პოდკასტში.
აღსანიშნავია, რომ Billboard-მა კომენტარისთვის კანიე უესტის წარმომადგენელთანაც სცადა დაკავშირება.
პოდკასტ Call Her Daddy-ს სრული ეპიზოდის სანახავად იხილეთ ბმული:
