ქართველი არტისტი Tamada ამჟამად ტურნეს ფარგლებში შეერთებულ შტატებში იმყოფება. ახლახან არტისტმა ლაივი ნიუ იორკში მდებარე საკონცერტო სივრცეში – Public Records-ში გამართა. როგორც აღმოჩნდა, კონცერტს ცნობილი მსახიობი, სარიტა ჩოდჰერი (Sarita Choudhury) დაესწრო. ჩოუდჰური მაყურებლის დიდმა აუდიტორიამ სერიალებიდან Homeland და And Just Like That იცის. ამ უკანასკნელში ჩოდჰერი ერთ-ერთ მთავარ როლს ასრულებს და პარტნიორობას ისეთ ვარსკვლავებს უწევს როგორებიც არიან სარა ჯესიკა პარკერი, კრისტინ დეივისი, სინთია ნიქსონი, ჯონ კორბეტი და სხვები.
მუსიკალური საღამოს შემდეგ Tamada-მ მსახიობთან ერთად გადაღებული ფოტოც გამოაქვეყნა. სოციალურ ქსელში პოსტი Tamada-ს მსმენელმაც გააზიარა:
„ყველაზე ნიუ-იორკული ამბავი, რომელიც გადამხდენია – ვდგავარ ჩემთვის, ლაპარაკში ვარ გართული და ველოდები, Tamada როდის დაიწყებს დაკვრას. უცებ გვერდზე ჩამიჩრილა ქალმა, რომელიც წამში ვიცანი და კი, გადავწითლდი სახეზე. სარიტა ჩოდჰერი. თქვენთვის შეიძლება ქერი ბრედშოუს ახალი დაქალი იყოს, მაგრამ ჩემთვის მირაა – სოლ ბერენსონის ცოლი Homeland-იდან,“ – წერს თათია წულაძე, რომელიც Tamada-ს კონცერტს ესწრებოდა. „და აქვე – კი, დედას ვფიცავარ, ისიც Tamada-ს მოსასმენად იყო მოსული,“ – ვკითხულობთ პოსტში.
Tamada მუსიკალური პროექტია, რომელიც ქართველმა მაყურებელმა 5 წლის წინ გაიცნო. პროექტი ქართულ ფოლკლორსა და თანამედროვე ელექტრონიკას ორიგინალური გზით აერთიანებს.
