2026 წლის გრემის ნომინაციების მოახლოებასთან ერთად ახალი მუსიკალური რელიზებიც მატულობს. შესაძლოა, ამ ნამუშევრებმა აკადემიის აღიარებაც დაიმსახურონ, რომელთა შორისაა Rosalía, კეტი პერი, Kehlani და სხვა შემსრულებლები.
კვირის ყველაზე განხილვადი გამოცემა სწორედ Rosalía-ს Lux გახდა. დიდი ხნის ნანატრი ალბომი 2022 წლის წარმატებული ნამუშევრის, Motomami-ს შემდეგ გამოვიდა. ამ ვრცელ ექსპერიმენტულ პროექტში Rosalía საკუთარ მუსიკალურ პროგრესს სიღრმისეულად იკვლევს. აღსანიშნავია, რომ ალბომში იგი 13 სხვადასხვა ენაზე მღერის.
„ეს დიდი გამოწვევა იყო, თუმცა ღირდა. ამით ბევრი რამ ვისწავლე და ვფიქრობ, ამ ალბომის ყოველი სიტყვისთვის დიდი ბრძოლა გადავიტანე. ველოდი და ბოლოს მივიღე კიდეც.“ – განუცხადა Rosalía-მ Billboard-ს ნოემბრის თვეში მიცემულ ინტერვიუში.
კვირის მუსიკალურ რელიზებს შორისაა ასევე კეტი პერის ახალი სინგლი – Bandaids, ემოციური სიმღერა, რომელიც ხანგრძლივი ურთიერთობის შემდეგ ცხოვრების ახალ ეტაპზე გადასვლის შესახებ მოგვითხრობს. მომღერალმა ყოველივე ეს ყოფილ პარტნიორ, ორლანდო ბლუმთან დაშორების შემდეგ განიცადა.
Kehlani-მ კი კომპოზიცია, სახელწოდებით Out the Window გამოაქვეყნა, რომელიც საკუთარი ქცევის შედეგად პასუხისმგებლობის აღებაზეა.
მუსიკალურ ინდუსტრიას თითქმის ათწლიანი პაუზის შემდეგ ჰილარი დაფიც დაუბრუნდა, რომელმაც ახალი სინგლი Mature გამოსცა, ხოლო Gorillaz-მა ჯგუფ Idles-თან კოლაბორაციის შედეგად ტრეკი The God of Lying გამოაქვეყნა.
აღსანიშნავია, რომ Rosalía არ იყო ერთადერთი არტისტი, რომელმაც ამ კვირაში ალბომი წარადგინა, ორწლიანი პაუზის შემდეგ ახალი პროექტით Danny Brown-იც დაბრუნდა. ახალი ალბომის სახელწოდებაა Stardust, რომელიც მისი წინამორბედი ალბომის, Quaranta-ს ერთგვარ გაგრძელებად ითვლება.
