2025 წლის ერთ–ერთი ყველაზე ხმაურიანი პოპკულტურული მოვლენა ტეილორ სვიფტისა და ტრევის კელსის ნიშნობა იყო – ამბავი, რომელმაც სოციალურ ქსელებში რამდენიმე დღის განმავლობაში დიდი ხმაური გამოიწვია. სწორედ ამ მასშტაბურმა ემოციურმა რეაქციამ განაპირობა, რომ კემბრიჯის ლექსიკონმა „წლის სიტყვად“ ტერმინი „parasocial“ აირჩია.
კემბრიჯის განმარტებით, „parasocial“ აღნიშნავს იმ განცდას, როცა ადამიანს უჩნდება ერთგვარი კავშირი ცნობილ ფიგურასთან, მიუხედავად იმისა, რომ მას პირადად საერთოდ არ იცნობს. როგორც კემბრიჯის ლექსიკონის სპეციალისტები აღნიშნავენ, აგვისტოში სვიფტისა და კელსის ნიშნობის გაშუქებამ ამ ტერმინის ძიების მაჩვენებელი რეკორდულად გაზარდა – ფანები ხუმრობით წერდნენ: „ვცდილობ, parasocial არ გავხდე.”
ტერმინის შერჩევაზე 2025 წელს ხელოვნური ინტელექტის ე.წ. ჩატბოტების განვითარებამ და მოხმარების მაჩვენებელმაც იმოქმედა. თუმცა ყველაზე დიდი ტალღა მაინც 26 აგვისტოს აგორდა, როცა სვიფტმა და კელსიმ ნიშნობის ფოტოები გამოაქვეყნეს. პოსტს ერთ საათში 14 მილიონზე მეტი მოწონება დაუგროვდა. ფოტოები წყვილმა ასე დაასათაურა: „თქვენი ინგლისურის და ფიზკულტურის მასწავლებლები ქორწინდებიან.“
თითქმის ორი ათეული წელია, ფანები უსმენენ ტეილორ სვიფტს, როგორ მღერის სიყვარულისგან მიყენებული გულის ტკენის, წარუმატებლობების და ოცნებების შესახებ. ამიტომაც მის „საოცნებო ფინალს“, რომელმაც ბევრს 2008 წლის ჰიტი – „Love Story“ გაახსენა, განსაკუთრებული ემოცია ახლდა. „ჩემი ახლო და პირადი მეგობარი ტეილორის გამო უბედნიერესი ვარ!“ – დაწერა ერთმა ფანმა.
კემბრიჯის ლექსიკონი „წლის სიტყვას“ 2015 წლიდან ირჩევს. 2024 წლის გამარჯვებული იყო „manifest“, ხოლო 2023-ის – „hallucinate“. 2025 წლის ფინალისტებს შორის ასევე აღმოჩნდა სიტყვები – „pseudonymization“ და „memeify“.
