სერ ელტონ ჯონი მსოფლიო პოლიტიკოსებს სთხოვს, არ დაუშვან აივ/შიდსის აღმოფხვრისთვის საჭირო კვლევების დასრულება.
მუსიკოსი Variety-ს ყდაზე გამოჩნდა. ინტერვიუში ის აკრიტიკებს პოლიტიკური მხარდაჭერის ნაკლებობას ამ სასიკვდილო ეპიდემიასთან ბრძოლაში და ამბობს, რომ პოლიტიკოსებს აქვთ შესაძლებლობა, დაავადებას ჩვენს სიცოცხლეშივე დაუსვან წერტილი. „უბრალოდ გაცხარებული ვარ,” – ამბობს ელტონ ჯონი. „ძალიან გულდასაწყვეტია, როცა ხელში გიჭირავს ინსტრუმენტები ამ ყველაფრის დასასრულებლად და ამ დროს აწყდები ქვეყნებს, როგორიცაა რუსეთი, ასევე აფრიკის, შუა აღმოსავლეთისა და აღმოსავლეთ ევროპის სახელმწიფოები, რომლებიც ამაში არ გეხმარებიან.”
რაც შეეხება აშშ-ს, ელტონ ჯონმა შეაქო ამჟამინდელი ადმინისტრაციის ძალისხმევა, დაასრულოს ომი ღაზაში, თუმცა ამავდროულად გააკრიტიკა ისეთი საკითხის უგულებელყოფისთვის, როგორიცაა აივინფექციისა და შიდსის აღმოფხვრა.
„აქ კიდევ სხვა ომია ადამიანებთან, რომლებიც აივინფექციითა და შიდსით იტანჯებიან და მათ უნდა ჰქონდეთ შესაბამისი მედიკამენტის მიღების შესაძლებლობა, მაგრამ არ აქვთ, რადგან ამას მთავრობები არ უშვებენ. ეს არაჰუმანურია. შესაბამისად, ჩემი მთავარი წუხილი ამ მომენტში ის არის, რომ, დიახ, მადლობა ღმერთს, შესაძლოა მეტი მშვიდობა გვქონდეს მას შემდეგ, რაც მეტი პრობლემა გადაიჭრება, მაგრამ აქ გვაქვს დანაშაული მილიონობით სხვა ადამიანის წინაშე, რომელიც მხოლოდ და მხოლოდ მთავრობების, სტიგმისა და სიძულვილის გამო ხდება.”
მუსიკოსს აივ/შიდსთან ბრძოლის დიდი ისტორია აქვს. მისი არაკომერციული ორგანიზაცია „ელტონ ჯონის შიდსის ფონდი” ამ დაავადების კვლევების მეხუთე ყველაზე მსხვილი შემომწირველია. ამ დრომდე ორგანიზაციამ 650 მილიონი დოლარის მობილიზება მოახერხა.
პოპვარსკვლავმა ისაუბრა კონკრეტულად დონალდ ტრამპზეც და აღნიშნა, რომ თუ ის ამ დაავადებასთან ბრძოლაში ძალისხმევას ჩადებს, მას შეუძლია ისტორიაში შევიდეს, როგორც ერთ-ერთი საუკეთესო პრეზიდენტი. „თუ ის შიდსის დასრულებას შეძლებს, ეს ნამდვილად გვირგვინი იქნება მისთვის.”
თუმცა მუსიკოსის სურვილის მიუხედავად, ტრამპის ადმინისტრაცია სხვა გზას ადგას. მათ შეაჩერეს შიდსის პრევენციიაზე მომუშავე გლობალური პროგრამებისთვის გამოყოფილი თანხები და ფედერალური დაფინანსების შეწყვეტით ღიად დაემუქრნენ საშინაო პროგრამებსაც, რომლებიც შიდსით დაავადებულთა დახმარებას ისახავს მიზნად.
„ეს დიდი იმედგაცრუებაა მაშინ, როცა გაქვს მედიკამენტი, გაქვს „პრეპი”, გაქვს ანტირეტროვირუსული თერაპია… ჩვენ შეგვიძლია შევაჩეროთ შიდსის გავრცელება, თუ ადამიანები უბრალოდ ნაბიჯს გადადგამენ და სხვა ადამიანებს ქრისტიანულად მოეპყრობიან.”
