Liquid Archive – ახალი მუსიკალური კოლექტივია, რომელიც 2025 წელს ჩამოყალიბდა. გუნდის წევრების თქმით, ეს ერთგვარი მუსიკალური კომუნიკაციის არხია, სადაც ერთმანეთისგან განსხვავებული გამოცდილებების გაზიარებით ვიზუალური და ხმოვანი იმპულსები ერთიანდება.
პროექტის წევრები არიან: ნიკო თევზაძე – დიზაინერი, დიჯიტალ არტისტი და ყოფილი გრანჟ ბენდის ბასისტი, ნიკიტა ანთელავა – მხატვარი, რომელიც ბოლო წლებში მუსიკით დაინტერესდა და ამ მიმრთულებით აქტიურად საქმიანობს, როგორც შემსრულებელი და ჰიპ-ჰოპ არტისტი, მოგვიანებით კი პროექტს ბაჩო სვანაძე – მუსიკოსი, პროდიუსერი, ხმის ინჟინერი და ამავე დროს ცნობილი ქართული ჯგუფის, SvanSikh-ის წევრი შეუერთდა.
ნიკო და ნიკიტა: – “თავიდანვე გამოვნახეთ საერთო ენა და მალევე გადავწყვიტეთ, შეგვექმნა მუსიკალური პროექტი. Liquid Archive-ის იდეა ბუნებრივად წამოვიდა. ერთობლივი მუშაობით და პატარა ექსპერიმენტებით საერთო ხედვა ჩამოგვიყალიბდა. პროცესის პარალელურად, მეგობრისგან ჯგუფის ახალი წევრიც გავიცანით. ბაჩომ, როგორც გამოცდილმა მუსიკოსმა, გაიზიარა ჩვენი ხედვა, იდეები და გადავწყვიტეთ, ერთად გვემუშავა.”
Liquid Archive-ის პირველი ერთობლივი ნამუშევარი Glowing Roads იყო, რომელსაც მალევე მოჰყვა ვიდეო რგოლიც:
“ტრეკის კლიპიც მალევე ნიკიტას სახლში გადავიღეთ, რომელიც მაშინ დამწვარი იყო. ჩვენთვის სიმღერის შინაარსი და ვიზუალური იმიჯი ერთმანეთთან შესაბამისობაში მოვიდა და საბოლოოდ საინტერესო პროექტი გამოგვივიდა.
მომდენვო ტრეკის კლიპებსაც მარტივად მივუდექით და საკუთარი რესურსებით გადავიღეთ, (SP DAIS, MUDDY WATERS) რომელიც ჩვენთვის ავთენტური და „ორგანული” გამოვიდა, საერთო ვიზუალურ-მხატვრული ხედვა ამაშიც გამოიხატება.”
რაც შეეხება Liquid Archive-ის სამომავლო გეგმებს, ამჟამად ახალ პროექტზე მუშაობენ, სადაც მთავარი, მათი თქმით, პროცესში თავისუფლება და არაჟანრული მიდგომაა:
„არ ვაპირებთ შემოქმედებითად და ჟანრობრივად შეზღუდვას. ჩვენთვის ეს არის კოლექტივი, რომელიც სხვადასხვა ფორმისა და შინაარსის აუდიო-ვიზულურ არქივს აგროვებს.” – აღნიშნავენ Liquid Archive-ის წევრები “Billboard საქართველოსთან” საუბარში.
მოუსმინეთ Liquid Archive-ის ტრეკს Glowing Roads:
