ბენი ბლანკოს დედა საკუთარ სახლში, კალიფორნიაში, ძარცვის მცდელობის მსხვერპლი გახდა. როგორც ABC7 იუწყება, პოლიციის თქმით, სანდრა ლევინი სახლში მარტო იმყოფებოდა და უვნებლად გადარჩა მას შემდეგ, რაც მძარცველები მის საცხოვრებელში შეიჭრნენ. ოფიციალური უწყებები ლევინის იდენტიფიცირებას არ ახდენენ, თუმცა მეზობლების ცნობებითა და უძრავი ქონების ჩანაწერებით დასტურდება, რომ სახლი სწორედ მას ეკუთვნის.
ოფიციალური ინფორმაციით, ლევინი სააბაზანოში იმალებოდა, საიდანაც დახმარებისთვის 911-ს მიმართა მას შემდეგ, რაც გაიგონა, როგორ ჩაამსხვრიეს ეჭვმიტანილებმა შუშის კარი. ლევინმა გაიგონა, როგორ ავიდნენ ისინი მეორე სართულზე და გააღეს საძინებლის კარი. ხოლო როცა მან სააბაზანოდან გამოიხედა, მძარცველებმა ის შენიშნეს და გაიქცნენ. როცა პოლიცია ადგილზე მივიდა, ეჭვმიტანილებს ტერიტორია უკვე დატოვებული ჰქონდათ.
თუმცა, არსებული ინფორმაციით, მძარცველებმა გაქცევამდე რამდენიმე ოთახი გაჩხრიკეს და გარკვეული ნივთები მოიპარეს. ამ ეტაპზე უცნობია, რა ნივთებზეა საუბარი. ასევე უცნობია, იყვნენ თუ არა მძარცველები შეიარაღებული. ძარცვაში მონაწილე პირები ჯერ კიდევ არ არიან იდენტიფიცირებული, თუმცა, პოლიციის თქმით, საუბარია ორ მამაკაცზე, რომელთაც ეცვათ მუქი ტანისამოსი და ეკეთათ ნიღბები. „ბილბორდთან” საუბარში პოლიციის დეპარტამენტის წარმომადგენელმა განაცხადა, რომ ამჟამად საქმის მასალები გამომძიებლების ხელშია.
ბენი ბლანკოს ინციდენტთან დაკავშირებით კომენტარი არ გაუკეთებია.
