26 ნოემბერს ლეიბლ for no reason-ის ქვეშ პროექტ Araushavs-ის პირველი სიმღერის დებიუტი შედგა. Oh Margarita – დები იშხნელების შთაგონებით შექმნილი კომპოზიციაა.
სინგლი პროექტის მომავალ ალბომში შევა, რომელიც 2026 წლის გაზაფხულზე გამოვა. ეს სინგლი მესამე ოფიციალური რელიზია ლეიბლისთვის, რომელიც სანდრო თედიაშვილის დაარსებულია. Araushavs-ის წევრები კი სანდრო თედიაშვილი, გვანცა ენუქიძე და ზურაბ ბაბუნაშვილი არიან.
სანდრო თედიაშვილი – ლეიბლ for no reason records-ის დამაარსებელი:
„შეკვეთა მქონდა თეატრიდან და ვმუშაობდი სწორედ დები იშხნელების ,,ო, მარგარიტაზე”. სიმღერის რამდენიმე ვარიაცია შევქმენი და ერთ-ერთი ვერსია, რომელიც სპექტაკლისთვის არ გამოიყენეს, გამოუქვეყნებელი დარჩა. გვანცა ენუქიძე და ზურაბ ბაბუნაშვილიც ჩემი მეგობრები და თანამშრომლები არიან. მათთან ერთად მუშაობა ძალიან დიდ სიამოვნებას მანიჭებს, შესაბამისად, დაახლოებით სამი-ოთხი თვის მუშაობის შემდეგ გამოგვივიდა პატარა ალბომივით, რის გამოშვებასაც for no reason-ზე ვგეგმავთ. ასევე დაიბეჭდება ფირფიტები. თავად პროცესი ხანგრძლივი, მაგრამ ძალიან სასიამოვნო აღმოჩნდა.”
Oh Margarita-ს ვიდეო-კლიპზე შიო ხიდაშელი მუშაობდა, რომლის ვიზუალური ესთეტიკაც მუსიკის ატმოსფეროს სინთეზურად ერწყმის.
მოუსმინეთ Oh Margarita-ს, დები იშხნელების ინსპირაციით შექმნილ მუსიკალურ კომპოზიციას.
