Diddy-ს ვაჟები – ჯასტინი და კრისტიან კინგ კომბსი მზად არიან, საჯაროდ ისაუბრონ მამის სასამართლო პროცესსა და მედიის ხმაურზე, რომელიც Diddy-ს გარშემო გაჩნდა მას შემდეგ, რაც 2023 წელს კესიმ მის წინააღმდეგ გახმაურებული სარჩელი შეიტანა. საქმე სასამართლოს გარეშე მოგვარდა სარჩელის შეტანიდან მხოლოდ ერთ დღეში, თუმცა სწორედ ამ ეპიზოდმა დაუდო საფუძველი რეპერის ირგვლივ შემდგომ განვითარებულ მოვლენებს.
ძმები კომბსები 28 დეკემბერს დაანონსებულ, ამ ეტაპზე უსათაურო დოკუმენტური სერიალის ტრეილერში გამოჩნდნენ. ვიდეოში ჯასტინი და კინგი სახლის კინოთეატრში სხედან, ფონზე აუდიოფრაგმენტები ისმის და ეკრანზე ჩნდება მედიის მასალები. ტრეილერი მთავრდება სცენით, სადაც ვაჟები ცდილობენ, შონ კომბსს სატელეფონო ზარით დაუკავშირდნენ, როდესაც ის პატიმრობაში იმყოფება.
ტრეილერში რამდენჯერმე ჩნდება ფრაზები: „ოჯახი“, „ჩვენი ხმა“, „ერთგულება“, „ღალატი“, „სიმართლე“ და „ტყუილი“. სერიალის პრემიერა 2026 წელს Zeus Network-ზე არის დაგეგმილი. პლატფორმის დირექტორმა, ლემუელ პლამერმა, ინსტაგრამის კომენტარში განმარტა, რომ პროექტის მიზანი არა შონ კომბსის მხარდაჭერა, არამედ მისი ვაჟებისთვის საკუთარი ისტორიის მოყოლის საშუალების მიცემაა.
„გასაგებად რომ ვთქვა, ეს დოკუმენტური სერიალი ჯასტინსა და კრისტიანს აძლევს შესაძლებლობას, საკუთარი ამბავი გააზიარონ,“ – დაწერა პლამერმა. „ჩვენ არ ვუჭერთ მხარს Diddy-ს ან რომელიმე სხვა პირის ქმედებებს. გვჯერა, რომ ადამიანებს უნდა ჰქონდეთ პლატფორმა საკუთარი გამოცდილების მოყოლისთვის, ზუსტად ისე, როგორც ამას დოკუმენტურ სივრცეში მოქმედი ნებისმიერი მედია აკეთებს. ჩვენ უბრალოდ ვქმნით შესაძლებლობას, ეს ისტორიები ითქვას და სწორედ ეს არის ჩვენი მთავარი არსი.“
კომბსის შვიდი შვილი მამის დაკავების შემდეგ საჯაროდ იშვიათად საუბრობდა. წელს კინგ კომბსმა Ye-სთან ( კანიე ვესტი) ერთად გამოუშვა Never Stop EP, რომელიც ორივე მშობელს მიუძღვნა – გარდაცვლილ კიმ პორტერს და Diddy-ს.
Diddy-ს ოქტომბერში 50-თვიანი სასჯელი მიესაჯა. ის დამნაშავედ არ ცნეს უფრო მძიმე ბრალდებებში, მათ შორის ორგანიზებულ დანაშაულსა და სექსუალურ ტრეფიკინგში, თუმცა ბრალი დაუდასტურდა პროსტიტუციასთან დაკავშირებული ფედერალური კანონების დარღვევაში.
Zeus Network-ის დოკუმენტური სერიალი დაანონსდა მალევე, მას შემდეგ, რაც დეკემბრის დასაწყისში Netflix-ზე 50 Cent-ის პროექტის – Sean Combs: The Reckoning-ის პრემიერა შედგა.
50 Cent კომბსების სერიალის ტრეილერს ინსტაგრამზე მალევე გამოეხმაურა: „WOW, მინდა ვნახო ეს შოუ. არ ვიცი, კარგი იდეა იყო თუ – არა,“ – დაწერა მან.
Billboard-მა Diddy-ს წარმომადგენლებს კომენტარისთვის მიმართა.
ნახეთ დოკუმენტური სერიალის ტრეილერი.
