დუა ლიპამ ინსტაგრამზე ოჯახური ფოტოების კარუსელი გამოაქვეყნა და გამომწერებს გაუზიარა, თუ როგორ ატარებს სადღესასწაულო პერიოდს.
პოპვარსკვლავი ფოტოებში საქმროსთან, მსახიობ კალუმ ტერნერთან ერთად პოზირებს. კადრებში ჩანს, თუ როგორ ამზადებს ლიპა სადღესასწაულო სადილს, რომელსაც წყვილის საყვარელი ადამიანები ესწრებიან.
„ეს არის სიყვარული… წელს საოცრად გამომივიდა მომზადება (ყველა ვარსკვლავი საჩემოდ განლაგდა მას შემდეგ, რაც 6 თვეა, სამზარეულოში არ შევსულვარ)” – წერს ლიპა პოსტში. „ყველას გილოცავთ დღესასწაულებს და გიგზავნით სიყვარულს.”
პოსტიდან ცოტა ხანში კი გრემის მფლობელმა არტისტმა 2025 წლის რამდენიმე ფოტო გააზიარა, რომელთა შორისაცაა ტერნერთან ნიშნობის ამსახველი კადრი. „მზად ვარ 2026-სთვის. ყველაფერი უკეთესობისკენ მიდის!” – დაწერა მომღერალმა.
გასული წლის ივნისში ლიპამ დაადასტურა, რომ ის და ტერნერი დაინიშნენ. მათი რომანის შესახებ ჭორები 2024 წლის იანვრიდან ვრცელდებოდა. „ეს ძალიან ამაღელვებელია,” – უთხრა მან ბრიტანულ „ვოგს” ზაფხულში. „გადაწყვეტილება, რომ ერთად დაბერდეთ, ერთად გაიაროთ ცხოვრება და უბრალოდ საუკეთესო მეგობრები იყოთ – ეს მართლაც განსაკუთრებული შეგრძნებაა.”
დეკემბერში ლიპამ Radical Optimism-ის ერთწლიანი ტურნე დაასრულა, რომელიც მის 2024 წლის ამავე სახელწოდების მქონე ალბომს ეძღვნებოდა. ალბომი Billboard 200-ის მეორე ადგილზე გავიდა.
ჯერჯერობით უცნობია, იქნება თუ არა 2026 წელი წყვილის ქორწინების თარიღი. როგორც ლიპამ ბრიტანულ „ვოგს” უთხრა, „მინდა, რომ ჯერ ჩემი ტურნე დავასრულო, კალუმმა კი – გადაღებები, ასე რომ, ჯერჯერობით ამ პერიოდით ვტკბებით. არასდროს ვყოფილვარ იმ ტიპის ადამიანი, რომელიც ქორწინებაზე ოცნებობდა, ან წარმოიდგენდა, თუ როგორი პატარძალი იქნებოდა. და უცებ დავიწყე: ‘ღმერთო, რა უნდა ჩავიცვა?’”
